NRK Meny
Normal

Čađahit-sátnái leat nu váibmilat

Čađahit-sánis ii leat mihkkege sivaid iešalddes, muhto dáidit leat menddo váibmilat dien sátnái, erenoamážit go jorgalat dahje heivehat teavsttaid sámegillii.

Máŋgii sáhtášeimmet eará sáni bidjat dan sadjái omd. dadjat lágidit dahje doallat čuoigangilvvuid dan sajis go čađahit čuoigangilvvuid.

Ii gánnát liiggástallatge

Čađahit-sátni lea buorre sátni, muhto ii gánnát liiggástallatge. Gánnáhivččii iskkastit ahte sáhtášiigo eará láhkai dadjat geavatkeahttá čađahit-sáni.


Dávjá ii dárbbaš oppanassiige ohcagoahtit eará sáni go dajaldagas sáhttá jo leat sátni man sáhttá jorahit vearban, omd. ...ahte dál leat hotealla huksema čađaheamen sáhtášii dadjat ná:

  1. ...ahte dál leat huksegoahtán hotealla
  2. ...ahte dál leat huksemin hotealla.


Dá gis eará ovdamearka:
Dán jagi leat čađaheamen geahččalanortnega ealgabaivddus sáhtášii gis ná dadjat

  1. Dán jagi leat geahččaleamen ođđa ealgabivdoortnega dahje
  2. Dán jagi áigot geahččalit/geahččaladdat ođđa ealgabivdoortnega.