«Vargga moaskedav ájge ja åvdåstime diehti. Lav aj ietjam vieljatjijn ja ietjá lahka ulmutjij ságastam, ja ihkap sij e ga boade!»
Dáv tjállá Samuel Gælok, gut la avta rádjálåvsåjs bárnne, Divtasvuona suohkanoajvváj e-påsta baktu.
– E åvvånis gulldala ulmutjijt majt sij sihti, javllá Gælok NRKaj.
Stuoráp dáhpádusáv
Mujttogiergge la rádjálåvsåjda ja ietjá sámijda Divtasvuonan doarroájgij sinna gijtton. Gæloka mielas ij la mujttogierge ilmodibme værddogis.
– Álgos lij ma ájggom stuoráp dáhpádusáv dahkat. Valla dánna suohkanoajvve galggá jådedit dáv ja de boahtá biskoahppa, sámedikkepresidænnta ja Árrana direktørra. Valla vájllup stáhta oasseválldev.
Bierri sjáhtjaluvvat
Divtasvuona suohkan diedet ilmodibme sjaddá boahtte mánnodagá, ja Gælok murkes gå gåhttjom nav maŋŋet boahtá.
– Gå mån ájttsiv dáv de ållu bivvasij loasskiv. Dåssju vahkko åvddåla boahtá girjje gånnå tjuodtju sij gåhttju dán stuorra dáhpádussaj Måsskåj.
Dán gåhttjomin maŋŋeboahtte sierraláhkáj gåhtjoduvvi boahtet, valla Gæloka mielas bierri ilmodibme gæssáj sjáhtjaluvvat.
– Dát galgaj sjáhtjaluvvam gæssáj gå la bivval, gå ulmutja asstadij boahtet ja oadtju dáv gullat riektaláhkkáj, ja ij dåssju nágin biejvev åvddåla. Duodden moattes maŋŋeboahttijs årru ierit Divtasvuonas.
Gælok javllá gå lij juo 16 jage ilmodimev vuorddám, de máhtti ulmutja vuorddet ájn nágin máno.
– Baláv sij soabmása danna sjaddi. Iv jáhke moattes dåk vuolggi gåjt dal maŋŋeboahttijs. Vuorddám lip 16 jage gå suohkan la vajálduhttám dáv ilmodimev ja guddnedimev. Gå lip nav mælggadav vuorddám, de vierttip aj máhttet vuorddet nágin máno, edisik giessebivvalij.
