NRK Meny
Normal

– Ulmutja e galga dárbahit gujddit

– Ihkap vierttiji sáme smaredit ja vuosstálasstet ja dahkat dav majt varresvuodaministar javllá, gujddigoahtet.

Lars Filip Paulsen

Lars Filip Paulsen gut la belludakguojmme varresvuodaministarijn miela milta la viehka lájttalahtte jus sáme galggi hæhttut gujddit åvdås fálaldagájt galggi oadtjot ietjasa dárboj gáktuj.

Foto: Simon Piera Paulsen / NRK

Dav javllá Oalgesbelludagá sámedikkeájras Lars Filip Paulsen Divtasvuonas vásstádussan varresvuodaministar Bent Høie ávttjimussaj jut sáme vierttiji gujddit jus ælla dudálattja varresvuoda dievnastusáj ma fáladuvvi.

Sáhka le guovllomedisijnalasj guovdásj Nuortta-Sáltton ja árabut dán vahko bajedij Sámedikkepresidænnta Aili Keskitalo ássjev varresvuodaministara Bent Høie åvddåj.

– Vuojnunagi hæhttup gujddigoahtet

Bent Høie

– Sáme bierriji gujddit fylkadåktårij ja pasientoahttsáj jus ælla dudálattja varresvuoda ja huksodievnastusá, javllá varresvuodaministar Bent Høie.

Foto: Mette Ballovara / NRK

Høie javllá jus sáme ælla dudálattja varresvuodadievnastusáj de vierttiji gujddit.

– Sáme bierriji gujddit fylkadåktårij ja pasientoahttsáj jus ælla dudálattja varresvuoda ja huksodievnastusá.

Lars Filip Paulsen gut la belludakguojmme varresvuodaministarijn miela milta la viehka lájttalahtte jus sáme galggi hæhttut gujddit åvdås fálaldagájt galggi oadtjot ietjasa dárboj gáktuj.

– Suohkanij ja stáhtaj systema bierriji sajen liehket vaj ulmutja e galga dárbahit gujddit åvdås rievtesvuodajt oadtju. Valla vuojnunagi hæhttup gujddigoahtet ja mijá dárbojt åvdedit, dættot sån.

Majt dahkat gå sáme li unneplågon

Varresvuodaministar Bent Høie javllá ássje guovllomedisijnalasj guovdásj Nuortta-Sáltton gullu suohkanijda tjoavddet.

– Varresvuodadievnastusá vuododásen gulluji suohkanij åvdåsvásstádussaj fállat, ja jus dal mak stáhtta lij ietjas segadit dán ássjáj de ij lim dat huoman majdik tjoavddet, gå huoman vierttiji suohkana dåjmadit dájt varresvuodadievnastusájt.

Oalgespolitihkkár ja sámedikkeájras Lars Filip Paulsen javllá li dåssju niego dasi majt varresvuodaministar javllá jut suohkana galggi bájkálattjat buorre tjoavddusijt buktet vaj sáme oadtju buorre hiebadahtedum varresvuodafálaldagájt.

– Mån la gullam sån dav javllá, ja sávav lij dal dat dåhkkit, valla majt de dahkat jus suohkana e dáv åvdåsvásstádusáv válde suohkanijn gånnå sáme li unneplågon, gåktu galggá de sámij jiedna ja dárbo gullut ja váraj váldeduvvat, gatját Paulsen. Varresvuodafálaldagá sámijda la stáhtta åvdåsvásstádus. Dav lav åvddåla javllam ja dálla vat dav javlav.