NRK Meny
Normal

– Suohkan lea čiehkan dokumeanttaid

Son oaivvilda suohkana čiehkan dokumeanttaid sámi allaskuvlla huksenáššis ja árvvoštallá advokáhta váldit veahkkin.

Diehtosiida Guovdageainnus
Foto: Åse Pulk

Ránnját leat guhká moaitán dan go ođđa sámi dieđaviessu Diehtosiida Guovdageainnus šaddá nu stuorisin, ja dagaha ahte sii eai oainne olu eará go dán seainni.

Dál lea ránnjá Isak J. Turi gávdnan fargga 30 jagi boares dokumeanttaid maid oaivvilda suohkana dihtomielalaččat čiegadan suohkanstivrras.

Ii oainne šat maide

Turi lea okta Diehtosiidda lagamus ránnjáin. Son lea ovdal moaitán huksema medias, go oaivvilda ahte dat njeaidá árvvu su viesus, ja ahte ii oainne šat olus eambbo go Diehtosiidda seainni.

Dál lea gávdnan áššebáhpiriid mat čájehit ahte go Suodjalus áiggui hukset 500 m2 sturrosaš viesu seamma báikái gokko dál lea Diehtosiida, de sihke suohkana huksenráđđi ja Finnmárkku fylkkamánni hilgo huksema.

Isak Turi ii loga dálá suohkanstivrii dáid báhpiriid oba biddjonge ovdan, ja imaštallá go dás lea sáhka viesus mii lea lahka 20 geardde stuorát go dat maid 30 jagi áigi áigo hukset.

GULDAL: – Suohkan lea čiehkan dokumeanttaid

– Ii miellaeavttus

Guovdageainnu doaibmi sátnejođiheaddji Jan Ole Buljo ii loga suohkana miellaeavttus čiegadan áššebáhpiriid ja lohpida jođáneamos lági mielde vástidit Isak J. Turi reivve.

GULDAL: Suohkan vástida