Spábbačiekčanskuvla Gáivuonas: – Spáppastallamii ii dolkka

Badjelaš 60 máná leat čoagganan Holmen-spábbačiekčanšilljui Siskkit-Gáivutnii. Muhtumat leat oasálastán sihke Norway Cup ja Altaturneringena čiekčamiidda, eaige loga gal dolkan spáppastallamis.

Spábbačiekčan skuvla Gáivuonas

Siskkit-Gáivuona valáštallansearvi (IKIL) lágida golbma beaivásaš spábbačiekčanskuvlla Holmen-spábbačiekčanšiljus. Badjel 60 máná servet.

Foto: Klemet Anders Sara / NRK-Sápmi

Badjelaš 60 máná iešguđet gilážiin Gáivuonas leat searvan spábbačiekčanskuvlii Siskkit-Gáivutnii.

Áŋgiris mánát

Siskkit-Gáivuona (IKIL) hárjeheaddji, Odd Harald Fagerli

Lea somá go ná olu mánát leat boahtán spábbačiekčanskuvlii ja dát addá sihke mánáide ja hárjeheddjiide ovdánanvejolašvuođa, dadjá Odd Harald Fagerli.

Foto: Klemet Anders Sara / NRK-Sápmi

Siskkit-Gáivuona spábbačiekčanhárjeheaddji, Odd Harald Fagerli muitala ahte geahččalit dán jagi lágidit spábbačiekčanskuvlla, go Gáivuonas ii leat lágiduvvon dákkár skuvla 1980-logu rájes.

– Mánát leat erenoamáš áŋgirat spáppastallat, go diehtit ahte máŋggas dáin mánáin serve sihke Norway Cup ja Altaturneringen čiekčamiin ja dasa lassin ii leat go vahku vel dassái go skuvllat álget, dadjá Fagerli.

Mánát leat vihtta ja 14 jagi gaskkas.

Váhnemat ja mánát ilus

Erlend Fagerli

11-jahkásaš Erlend Fagerli ii loga dolkan spáppastallamii, ja lea guhká juo illudan dán spábbačiekčanskuvlii.

Foto: Klemet Anders Sara / NRK-Sápmi

Siskkit-Gáivuona bártnáš, Erlend Fagerli oasálasttii Altaturneringen-čiekčamiin. Erlend ii loga goassege dolkat spáppastallamii, go dat lea nu somá.

– Dáppe oahppá olu ja dál lean aitto oahppan movt čievččastit spáppa eará čiekčái leahtus, dadjá Erlend. Som lohká erenoamáš somán go leat ožžon vel ovddeš dovddus spábbačikčiid hárjeheaddjin deike.

Johan Matteus Triumf orru Biertaváris, sus lea bárdni fárus spábbačiekčanskuvllas. Triumf mielas lea buorre go sin valáštallansearvi lágida dákkár skuvlla.

– Dát addá ođđa vejolašvuođaid sihke mánáide ja hárjeheddjiide oahppat ođđa vugiid movt sáhttá hárjehallat ja doaivumis mánát šaddet buoret čiekčin, dadjá Triumf.

Ovddeš dovddus spábbačiekčit oahpaheaddjin

Truls Jenssen, bagadalli spábbačiekčanskuvllas

Ovddeš dovddus spábbačiekčit bagadallin spábbačiekčanskuvllas. Dá Truls Jenssen čilgemin mánáide.

Foto: Klemet Anders Sara / NRK-Sápmi

Romsalaš Truls Jenssen lei dovddus 1980-logus go čievččai Romssa joavkkus TIL. Son lei fárus go TIL šadde norggameašttirin 1986:s. Jenssen lea hárjehallan nugo Sogndal ja Sálašvákki joavkku ja bargá dál Romssa spábbačiekčanbiires ovddidit buriid nuorra čikčiid ja hárjeheddjiid.

Siskkit-Gáivuona spábbačiekčan hárjeheaddji, Odd Harald Fagerli jáhkká dás lea ávki go ožžot ovddeš dovddus násttiid fárrui oahpaheaddjin spábbačiekčanskuvlii. Maiddái Vuošvákki nuorra nieidaspábbačiekčit leat oahpaheaddjit spábbačiekčanskuvllas Siskkit-Gáivuonas, mii bistá golbma beaivvi.

Spábbačiekčanskuvla juohke jagi

Siskkit-Gáivuona hárjeheaddji ja spábbačiekčanskuvlla lágideaddji, Odd Harald Fagerli dadjá ahte soitet lágidit dákkár skuvlla juohke geasi, muhto fertejit dieđusge árvvoštallat dán maŋŋel go leat geargan dán jagi doaluiguin.

  • Gula lágideaddji Odd Harald Fagerli:
  • Gula vánhema Johan Matteus Triumf: