NRK Meny
Normal

– Somá go buohkat besset váldit oasi Sápmi pride-doaluin

Bearjadaga lágiduvvo paneladigaštallan Sápmi pride oktavuođas das movt min servodat sáhttá láhčit buoret dili sámi bonjuide. Dán sáhtát maid čuovvut njuolga NRK Sámi neahttasiiddu bokte.

Mo sáhttá min servodat láhččit buoret dili sámi bonjuide? Panelaoassálastit Aili Keskitalo, Johan Vasara, Helga Pedersen ja Sven Henriksen digaštallet dan.

Sápmi pride lágida bearjadateahkeda guokte ságastallama Diehtosiiddas Guovdageainnus. Diibmu 19 vuos lea fáddá «Bonju olbmot sámi girkoeallimis» ja dás leaba Siri Broch Johansen ja proavás Egil Lønnmo mielde.

Sáddejuvvo njuolga NRK Sámi neahttasiiddus

Dávvet Bruun-Solbakk

Sápmi Pride prošeaktajođiheaddji Dávvet Bruun-Solbakk ja NRK Sámi debáhttajođiheaddji Anne Marie Hætta leaba ráhkkaneame lágidit paneladigaštallama bearjadaga Diehtosiiddas Guovdageainnus.

Foto: Åse Pulk/NRK

Diibmu 20 leages fáddá «Mo sáhttá min servodat láhčit buoret dili sámi bonjuide?». Dát lea paneladigaštallan mas leat mielde Sámedikki presideanta Aili Keskitalo, Bargiidbellodaga politihkkár Helga Pedersen, neavttár Sven Henriksen ja Guovdageainnu sátnejođiheaddji Johan Vasara.

NRK Sápmi sádde neahta bokte njuolga dan maŋit ságastallama, ja digaštallama jođiha NRK Sámi journalista Anne Marie Hætta.

– Lea hui miellagiddevaš go mii lágidit dán digaštallama, ja sávan ahte olbmot bohtet geahččat ja ahte maiddái servet digaštallamii gažaldagaiguin, lohká Hætta.

Sápmi pride prošeaktajođiheaddji Dávvet Bruun-Solbakk mielas lea hui somá go digaštallan sáddejuvvo njuolga neahta bokte.

– Olbmot miehtá Sámi besset nu čuovvut digaštallama, vaikko eai leatge Guovdageainnus. Nu besset buohkat váldit oasi doaluin.

Sápmi pride lea levgen Diehtosiiddas

Sápmi pride čájeha leavggain ahte sii leat Diehtosiiddas lágideame doaluid, leavga lea seaguhus sámi leavggas ja arvedávgeleavggas.

Foto: Anne Marie Hætta/NRK

– Sámi servodat ii leat váldán ovddasvástádusa

Dávvet Bruun-Solbakkas leat stuora vuordámušat ságastallamiidda bearjadateahkeda. Son lohká hástaleaddjin leat bonju sápmelažžan ja oaivvilda sámi servodaga ovddasvástádussan čáhkket saji buot norbmarihkku sápmelaččaide.

– Midjiide geat leat plánen lea hui dehálaš leamaš ahte mii galgat suohtastallat, dánsut ja juoigat, muhto lea dehálaš maid muitit manne mii leat sirdán Sápmi pride Guovdageidnui. Das lei muhtinlágan ulbmil, ja lea dehálaš čalmmustahttit dan maid. Sámi bonjut rahčet veahá, ovdamearkka dihte girkoeallimis, ja sámi servodat, politihkkárat ja ásahusat, eai leat váldán ovddasvástádusa. Áigut gažadit movt dál manná ovddasguvlui.

Háliidit loktet bonjuid ášši alit dássái

Dávvet Bruun-Solbakk vuorddášii ahte paneladigaštallama bokte sáhtáše loktet sámi bonjuid ášši veahá eará dássái, vai digaštallojuvvo maiddái politihkkáriid dásis.

In jáhke ahte lea dahkkon dán láhkai ovdal, ahte leat digaštallan movt sáhttá servodat láhčit buoret dili sámi bonjuide. De fertejit politihkkárat vástidit váttes gažaldagaide, ja šaddá miellagiddevaš gullat movt sii vástádit. Lea somá go sii leat searvame digaštallamii, erenoamážit Johan Vasara, gii lea Guovdageainnu sátnejođiheaddji, lohká Sápmi pride prošeaktajođiheaddji Dávvet Bruun-Solbakk.