Ruoŧa sámeministtara sámepolitihkalaš ráđđeaddi, Magnus Kindbom, mielde Ruoŧŧa lea gearggus šiehtadallagoahtit oktasaš davviriikkalaš sámekonvenšuvnnas. Kindbom muitala, ahte Ruoŧa, Suoma ja Norgga sámeministtariid ulbmilin lea deaivvadit nu johtilit, go vejolaš boahtte jagi (2010) álggogeačes.
– Oktasaš čoahkkimis sii áigot earret eará árvvoštallat, makkár vejolašvuohta lea šiehtadallagoahtit davviriikkalaš oktasaš sámekonvenšuvnnas, Kindbom čilge.
GULDAL:
Norgga ođasmahttin- ja girkoministtár, Rigmor Aasrud, lea gierdameahttun dán áššis. Son lohká iežas áigut láidestit Ruoŧa ja Suoma stáhta, vai šiehtadallamat vuolggášedje johtui 2010:s.
Eahpečielggas goas ráđđádallagohtet
Vaikko Ruoŧŧa lea ovttaoaivilis, de Kindbom ii dieđe, guđe beaivve šiehtadallamat sáhttet álggahuvvot.
– Vuos fertejit gávnnahit, mo šiehtadallamat galget čađahuvvot, ja geat galget leat mielde šiehtadallamiin. Ruoŧa ráđđehusa ja Ruoŧa Sámedikki gaskkas gal eai šat gávdno áktánas čoavddekeahtes čuolmmat dán oktavuođas, Kindbom muitala.
– Fertejit gazzat oahpu
Ruoŧa Sámedikki stivrraságadoalli, Sara Larsson, lohká Ruoŧa ja Suoma eiseválddiid fertet oahppat Norggas ja dohkkehit sápmelaččaid sierra álgoálbmogin, iige dušše gohčodit sámiid dušše vehádahkan.
– Vehádagain leat dušše individuálalaš - eaige kollektiivvalaš, iešmearridan rievttit, eaige vuoigatvuođat eatnamiidda ja čázadaige dego álgoálbmogiin, Larsson čilge.
Justa dát sáhttá šaddat váddáseamos čuolbman čoavdit lohká Ruoŧa sámepolitihkalaš ráđđeaddi Magnus Kindbom.
Davviriikkalaš sámekonvenšuvnna mihttomearrin lea duođaštit ja nannet dakkár vuoigatvuođaid, vai sámit beasašedje sihkkarastit ja ovddidit iežaset gielaid, kultuvrra, ealáhusaid ja servodateallima dan láhkai, ahte riikkaráját hehttejit dan nu unnán go vejolaš. NRK Sámi Radio ii leat fáhten Suoma eiseválddiid ságaide dán áššis.