– Mij lip riek dudálattja gå vuojnnep ieneplåhko Divtasvuona viesádijs sihti suohkanav juohket. Mij sávvap ådå struktuvrav gånnå allebielle tjanáduvvá suohkanij oarjjelin. Miján li juo uddni tjielgga tjadnusa Sálto-guovlluj.
Dav javllá Aktisasjlista juogosjådediddje, Jan Ivar Jakobsen. Aktisasjlissta la stuorámus opposisjåvnnålissta Divtasvuonan.
Viesáda sihke Gásluovtan ja Ájluovtan ma li suohkana guovdásjbájke, sihti suohkanav juohket boahtá åvddån vuojnnoguoradallamin. 68 prosenta álmmugis Ájluovtan ja 50 prosenta álmmugis Gásluovtan sihti suohkanav juohket. Unneplåhko sihtá vas bisodit udnásj suohkanrájájt.
– Muv mielas la åbbå buorre gå dal oadtjop soames tállajt dán gatjálvisá birra. Dat la ham vuostasj bále gå gatjálvisá duogen li soames tálla, javllá Jakobsen.
- Lågå aj:
- Lågå aj:
– Álmmugij buoremus tjoavdos
Aktisasjlissta belludagáj Oalges, Gåro, Risstalasj álmmukbelludak ja belludahtága li juo mierredam mij bierri Divtasvuona boahtte ájge suohkanstruktuvrra.
– Mijá mielas le dát buoremus tjoavdos álmmugij sihke praktihkalattjat ja ekonomija siváj diehti. Mijá mielas la juohkem buoremus álmmugij sihke gehtjadum sebrudagá tjalmij ja praktihkalattjat. Mij ham vuojnnep Divtasvuona suohkanin sjaddá gártjep ja gártjep ruhtadille, ja suohkanin la gássjelisvuohta dåjmadit suohkana dievnastusájt. Mån jáhkáv divna viesádijda Divtasvuonan sjaddá buorep jus suohkan juogeduvvá, javllá Jakobsen.
Jera nanna tjåhkkåhi
Nuppen bielen le Divtasvuona Barggijbelludak.
Sij li Divtasvuona stuorámus posisjåvnnåbelludak ja aktan TPL (Divtasvuona doarespolitihkalasj lissta) siján la stivrrimfábmo suohkanin ja siján la aj suohkanoajvve.
Valla madin borgárlijbielle politihkkárijs li gergas suohkanav juogátjit, de ælla sosialdemokráhta gærggusa dav sæmmi dagátjit.
– Divtasvuona Barggijbelludak ij la mierredam majdik juohkemgatjálvissaj.
Dav javllá Divtasvuona Barggijbelludagá sadjásasj jådediddje ja belludagá doajmme juogosjådediddje, Emma Kristensen.
Sån tjielggi Divtasvuodna la sæbrram prosjæktaj Ofuohtá guovlloráden ja dan baktu galggi sij gehtjadit moattelágásj alternatijvajt.
– Mij ep la gudik láhkáj majdik mierredam gatjálvissaj jus suohkanav juohket. Mijá mielas la ilá árrat dálla majdik dan birra javllat, javllá Kristensen.
Barggijbelludak vuorddá vájkkudusguoradallamav mij ássjev buorebut galggá tjielggit.
– Dálla lip mij prosessav tjadádime ja gehtjadip vájkkudusguoradallamav mij lulu buoremus Divtasvuona viesádijda.
Divtasvuona suohkanstivrra giehtadallá suohkanådåstusáv basádismáno 11. biejve.
Gatjálvis majt suohkanstivrra galggá giehtadallat le gatjálvis jus barggo Ofuohtá guovlloráde baktu galggá joarkket ja makkir ájggemierev suohkan galggá tjuovvot.
- Lågå aj:
- Lågå aj: