(Anáris: Maria Saijets, Yle Sápmi) Nuortalacčaid válljejuvvon ovdaolmmoš, Tanja Sanila, doaibmá gaskaboddosaččat jođiheaddjin dassážii go diggi mearrida máhttágo giela doarvái bures doalahit jođiheaddjidoaimma.
Geasset lei vel buorre vuoigŋa nuorttalaččaid njunnožiid gaskkas.
Nu ii leat šat.
Čavčča nuortalaččaid luohttámušolbmoválggain leat máŋgasat váidán iige ođđa ovdaolbmos leat leamaš čielga diehtu.
Gaskaboddosaččat jođiheaddjin
Ikte viimmat mearridii Davvi-Suoma hálddahusriekti, ahte válgavuoiti Tanja Sanila dat doaibmagoahtá luohttámušolmmožin, álggus vuos gaskaboddosaččat.
– Vehaš dat hehttii, muhto in jáhke nu váikkuhan earret ahte livččen šlundon, lohká Sanila.
Válggaid riidoáššin lea šaddan giella. Nuortalaslága mielde oainnat galgá luohttamušolmmoš máhttit sámegiela.
Válggaid váidáin olbmot oaivvildit, ahte Sanila ii livčče galgan dohkket oppa evttohassange, dasgo ii máhte sin mielas doarvái nuortalašgiela. Danne galggašii olles válgabohtosa gomihit.
Sanila gal bealistis lohka iežas máhttit nuortalašgiela. Almmolaš oktavuođain lea goittotge suomastan.
– Giella sáhttá jávkat
Samediggepolitihkkár Tauno Haltta lea okta nuortalaččain geat lea váidán válggaid. Son lohká iežas loavkašuvvan hálddahusrievtti gaskaboddosaš mearradussii, dieđiha
– Dás lea sáhka nuortalaškultuvrras ja giela jávkamis, jos ovdaolmmoš ii máhte giela de ii nuortalašlágas leat šat makkárge mearkkašupmi, son cuiggoda.
Válgavuoiti bealistis muittuha, ahte dušše oasáš nuortalaččain sámásta.
– Son ii leat dušše nuortalašgielahálliid luohttamušolmmos ja váikko ii sámásge almmolaččat, de ii dat mearkkaš dan ahte ii doarjjošii giellabarggu, deattuha Sanila.
Manimuš sátni válgamoivvis ii leat goittotge vel celkon.
Guovvamánu áigge galggašii Davvi-Suoma hálddahusriekti mearridit loahpalaččat, bissugo vai gopmánago válgaboađus. Dange maŋŋá sáhttá ášši goittotge váidojuvvot vel alimus hálddahusriektái.