Dát fuolastahttá sámi áhčiid geain leat mánát rivguiguin ja leat massán ovddasmorraša. Dál leat sii ásaheamen searvvi nannen dihte sámi áhčiid vuoigatvuođaid.
– Berre deattuhuvvot eanet servodagas
Dát lea ášši man dál berre deattuhit eanet servodagas, lohká Mikkel Anders Eriksen gii lea okta searvvi vuođđudeaddjin.
– Dál leat sii ásaheamen searvvi nannen dihte sámi áhčiid vuoigatvuođaid. Dát lea ášši man dál berre deattuhit eanet servodagas lohká, Eriksen.
Go Mikkel Anders Eriksen earránii máná etniin mearridii diggi ahte mánáid dikšu dahje ovddasmoraš galgá leat eatnis gii ii leat sápmelaš ja ii oro guovddáš sámi báikkis.
Ásaheamen searvvi
Dál lea Eriksen ovttas eará sámi áhčiiguin seamma dilis ásaheamen searvvi La meg få min samiske barndom nannen dihte sámi mánáid vuoigatvuođa doalahit goappeš váhnemiid giela ja kultuvrra.
– Ballá mánát amasmuvvet sámi vieruide
Eriksen ballá su mánát amasmuvvet sámi vieruide.
– Das lea goit váikkuhus dat ahte mánná ii oaččo mielde dan sámi birrasa ja giela, dadjá son.
Máŋga duhát máná vásihit jahkásaččat ahte váhnemat earránit. Eanaš áššiin soabadit váhnemat, muhto muhtin áššiid ferte diggi mearridit. Norgga diggi meannuda jahkásaččat lagabui 3000 ášši mas váhnemat eaba leat ovttaoaivilis goappá luhtte mánná galgá orrut.
– Oahpes hástalus go mánát masset sámivuođaset
Maŋimuš jagiid lea lohkku lassánan, ja eanaš dáin áššiin addojuvvo dikšu eadnái. Sis-Finnmárkku bearaš-suodjalus kantuvrra hoavda Eilif Norvang duođašta ahte lea dát lea oahpes hástalus go mánát masset sámivuođaset
– Dat gal lea hui dábálaš, dan láhkai - mánát ovtta guovllus saddet fárret de masset ja massigohtet daid oktavuođaid mat dan báikkis leat, fulkkiiguin, kulturduogažiin, ja go de fas bohtet ruovttoluotta de leat sii amasmánát, dadjá Norvang.