Idet tjåhkani suohkanstivra Ofuohtán aktisasj suohkanstivrraj Áhkanjárgan.
Da li Divtasvuona, Bálága, Áhkánjárga, Dielda ja Evenássje suohkana gudi de tjåhkani vuostak dal gulátjit mij la ráddidusá miella dájna suohkanådåstusájn, valla aj Sámedikke vuojnov dan ássjen gullat.
– Miján hæhttu liehket aktisasj ulmme barggat vaj sihkarasstet sámij rievtijt ådå suohkanijn, ja aj vaj sáme ássje ja sáme perspektijvva ij tjiegaduvá, valla boahtá ienebuv vuojnnusij.
Dav javllá sámedikkeráde Ann-Mari Thomassen guhti galggá Sámedikke åvdås tjielggit mij la Sámedikke vuojnno suohkanådåstussaj dán aktisasj Ofuohtá suohkanij suohkanstivran.
Ballá sámij dárbo lulu binnebut vuojnnusin
Thomassen ballá sámij dárbo ja suorge lulu binnut gå dal ájn stuoráp suohkana sjaddi.
– Mijá premissa le jut sáme perspektijvva galggá vuojnnusin, soajttá sjaddá nuppe láhkáj sámij dárbo lulu tjiegaduvvat.
- Lågå:
- Lågå aj:
Ofuohtá guovlloráde tjoahkki suohkanstivrajt Ofuohtán aktisasj suohkanstivrraj gånnå de sjaddá ságastallam dán boahtte ájge suohkanådåstusá birra.
Duodden Sámediggáj de galggá aj stáhtatjálle Jardar Jenssen Suohkan- ja ådåstuhttemdepartementa åvdås tjielggit mij la dát ådå suohkanådåstus ja fylkamánne Hill-Marta Solberg galggá giehttot suohkanådåstusá birra gehtjadum fylkamánne tjalmij. Telemarksforskning galggá aj åvddånbuktet sijá guoradallamav majt li tjadádam Ofuohtá guovlloráde åvdås.