NRK Meny
Normal

– Sámegieladilli heddjona

Sáme- ja suomagiela dilli hedjona jus Poršáŋggu smávva báikkit guorranit gieldda ruđahuvvama geažil, lohká sátnejođiheaddji.

Mona Skanke
Foto: Lars Birger Persen

Duorastat eahket lea álbmotčoahkkin Billavuonas gos politihkárat áiggošedje čilget álbmogii manne gielda ferte seastit 20 miljon kruvnna dán jagi. – In vuordde álbmogis áddejumi, čilge sátnejođiheaddji Mona Skanke.

– Ferte dohkkehit dili

– Vaikko eai dohkkehivčče, de aŋkke dihtet mo gieldda dilli lea, lohká Poršáŋgggu sátnejođiheaddji, Mona Skanke. Dán vuosttas álbmočoahkkimii Billávuonas leat Bargiidbellodat, Guovddášbellodat ja Sosialistálaš Gurotbellodat bovden.

– 20 miljon kruvnna ferte gielda seastit, ja dás ii leat árbmu, lohká Skanke.

Eambbo golut go dienas

Gielda lea boahtán dan dillái ahte leat menddo ollu golut tietnasa ektui. Skanke lohká goluid boahtit earet eará das go vássán golmma jagis lea 7 proseantta álbmogis guođđán gieldda. Dasto leat dološ vealggit čoggon. Gielda lea geahččalan ánuhit ahte eai dárbbašivčče olles supmi seastit oktanagas, muhto dán ii leat fylkkagielda dohkkehan ja lea dieđihan ahte gielda ferte váldit dán duođas ja guoddit noađi.

Ráđđealmmái galgá boahtte vahkkui leat árvalan gokko sáhtašii seastit, ja lohká dál juo ahte buot surggiin fertejit golut njiedjat. Maiddái skuvllaide čuohcá dát.

Ii muital heaittiha go skuvllaid

Porsanggus leat njeallje skuvlla - gieldda čoahkkebáikkis Leavnnjas, Billávuonas, Bissojogas ja Ruoššanjárggas.

– In sáhte muitalit árvalan go mon dál heaittihit skuvllaid vuoi in, muhto okta vuohkki livčči unnidit fálaldagaid dáid skuvllain, deattuha ráđđealmmái Gunnar Lillebo.

Dás šattašii de sáhka luohpahit nuoraidskuvladási smávva báikkiin ja fievrredit oahppiid Levdnjii skuvlii.

Ii rihkku lágaid

Láhka ii luoittašii oppanassii ge luohpahit muhtin dieid skuvllain, go mánáidskuvlamánáide šattašii menddo guhkes skuvlamátki, lohká Lillebo ja geassá dás Ruoššanjárgga ovdamearkan gos lea guhta miilla gieldda čoahkkebáikái Levdnjii.

– Mon váivašuvan smávva báikkiid boahtteáiggi dihtii maid, lohká sátnejođijeaddji Mona Skanke.

Go fálaldagat hedjjonit smávva báikkiin - nu go skuvlafálaldagat - de goarida dát smávva báikkiid. Vuoras olbmot báhcet vel dohko iehčanassii. Kultuvra ja giella han eallá olbmuid gaskkas. – Danne sáhttá sáme- ja suomagiella leat rašes dilis nu go Billávuonas ja Bissojogas, čilgesta Skanke.