– Ruhta bisseha sámi musihka

Sámi musihkka beaggá, muhto váilu ruhttá sin máibmái doalvut, lohká musihkkabuvttadeaddji ja lágaduseaiggát.

Musihkkadahkki Magnus Vuolab
Foto: Anne Olli / NRK

– Mon dieđan man váttis lea buori musihka fállat eará guovlluide go sámis, čilge Magnus Vuolab.

Gula: Musihkka ii beasa máilbmái

Ruhta mearreda

Kárášjohkalaš Magnus Vuolab čuojaha, buvttada ja sus lea maid iežas musihkkalágádus, danin dovdá son bures mo dát doaibmá.

– Dat lea hui ollu ruđa duohken jos galgá lihkostuvvat, jáhkká Magnus Vuolab.

Sámi musihkka lea beaggán maiddái stuorrá riikkamediáin, muhto ain livčči dat bargu ahte fuomášuhttit dán musihka.

Unnán barget fuomášuhttimis

Magnus Vuolab lohká ahte jos galgá lihkostuvvat olggobeallai sámi olahit musihkain, de ferte geavahit ruđa fuomášuhttit musihka.

– Go nu mo Sámedikkis ohccá doarjaga musihkkabuvttadeapmái, de manná ruhta buvttadeapmái ii ge jurddašuvvo márkanfievrredeapmái, čilge Vuolab.

Mari Boine, Duolva Duottar, Ann Mari Andersen, Johan Sara jr., Frode Fjellheim, Niko Valkeapää ja Intrigue, dalle lea namuhan muhtin joavkkuid mat sámis ja Norggas leat gullon, muhto lea varra dušše Mari Boine gii lea nákcen fuomášuhttit su musihka olggobeale sámi ja Norgga.

Sierra fuomášuhttindoaibma

Go Kárášjohkalaš Magnus Vuolab hállá sámi musihka birra, de jurddaša mo sáhttá lihkostuvvat maiddái sámis.

– Jos livčči sierra fitnodat mii márkanfievrreda dán musihka, de livčči buorre sámi musihkka olahit ođđa guovlluid, go sámi lágádusain ii gal gávdnu dál diet ruhta, loahpaha Vuolab.