NRK Meny
Normal

– Roassun Deanu čázádahkii

– Deanu čázádahkii sáhttet leavvat luossagoddi dávddat, go gii beare sáhttá almmá desinfiserekeahttá bivdosiid oastit interneahtas guovllu jávrriide ja jogaide.

Hans-Erik Varsi, direktør i Tanavassdragets fiskeforvaltning
Foto: Nils Henrik Måsø / NRK

Gii beare sáhttá dál lotnut Finnmárkkuopodagas (FeFo) guolástanlobi daid jávrriide ja jogaide, mat luoitet Deanu čázádahkii. Dát lea vejolaš almmá desinfiserekeahttá stákkuid, vuokkaid ja eará bivdobiergasiid.

Luossareivveeaiggádat, geain lea vuoigatvuohta bivdit firpmiiguin Deanus, ballet luossagoddi dávddaid sáhttit leavvat dán geažil Deanu čázádahkii.

– Jus olgoriikkalaččat dahje eará bivdit oggot dakkár bivdosiin mat leat geavahuvvon dakkár sajiin gos lea Gyrodactylus salaris, de dát parasihtta sáhttá leavvat Deanu čázádahkii ja jávkadit luossanáli. Ná ballá Luossareivveeaiggádiid oasussearvvi beaivválašjođiheaddji Hans Erik Varsi.

GULDAL: - Ballet roasus

– Ádde balu

Finnmárkkuopmodaga meahcástanossodaga hoavda, Rolf Kollstrøm, ádde fierbmebivdiid searvvi balu. Son goitge dáhkida iežaset čuovvut daid njuolggadusaid maid, Norgga eiseválddit leat ráhkadan, eastadan dihtii guolledávddaid leavvamis.

Norgga njuolggadusaid mielde bivdosiid ja fatnasiid galgá goikadit dahje desinfieret, ovdalgo dat geavahuvvojit eará čázádagas gos dábálaččat geavahuvvojit.

– Sii juhket juohke bivdái dieđuid dán birra, Kollstrøm dáhkida.

Olgoriikkalaččat eai sáhttán ovdal oastit guolástanlobi, ovdalgo čájehedje duođaštusa das, ahte bivdosat leat desinfiserejuvvon. Muhto dál eai dárbbaš dan dahkat.

FeFo áiguge dán jagi cegget šilttaid geaidnoguoraide, mat čájehit, gos gávdnojit desinfiseren stašuvnnat.