NRK Meny
Normal

– Rievidit mis maŋemus oasi

– Lullisámi kultuvra gal duššá ođđa bieggamillopárkka huksemiin Gaalpies Nordlanddas . Nu dadjet Voengelh Njaarke orohaga nuorat geat odne besse ášši čilget Oljo- ja energiijadepartementii. Departeameanta ii dáhto maidege vástidit go leat áššiin bargamin.

Elle Ristiiinna Utsi ja Ina-Theres Sparrok

Elle Ristiinna Utsi ja Ina-Theres Sparrok mielas lea bieggamilluid huksen Voengelh Njaarkii seamma go kultuvrralaš olmmošgoddin

Foto: Heaika Skum / NRK

– Dál leat mis rievideamen eret dan maŋimus oasi vel. Dieđusge dáhpáhuvvá nu ahte bohccot hilgot guovllu go bieggamillut dohko ceagganit. Mii de vel báhcá midjiide? Na ii mihkkege, dadjá Voengelh Njaarke orohaga Elle Ristiinna Utsi.

Buohtastahttá kultuvrralaš olmmošgoddimiin

Son lohká dili sáhttit buohtastahttit kultuvrralaš olmmošgoddimiin. Elle Ristiinna Utsi lohká geavahit ná garra sániid dan dihte go sis bihtáid mielde váldet guovlluid eará doaimmaide, nugo bartahuksemiidda, luottaide, bieggamilluide ja nu ain.

Gosa sii dasto galget

For å møte OED

Maŋábealde gurutravddas: Silje Lundberg, Norgga Luonddugáhttenlihttu, Magnus Storvoll Strømseth, Luondu ja Nuorat, Helge Aslaksen Ravna, NSR Ovddabealde: Ina-Theres Sparrok, Vuongelh Njaarke, Lena Cecilie Sparrok, Vuongelh Njaarke, Sáanne-Marja Utsi, Vuongelh Njaarke, Katja elise Utsi, Vuongelh Njaarke, Elle Ristiinna Utsi.

Foto: Heaika Skum / NRK

Ina-Theres Sparrok dadjá ahte vaikko sisabáhkken njuolga čuohcáge boazodollui, de ii leat dás dušše sáhka boazodoalus ealáhussan. Sisabáhkken goarida boazodoalu, muhto dalle ferte maiddái atnit muittus ahte sin boazodoallu lea sihke giela, biebmovieruid, bivttasvieruid, kultuvrra ja árbevieruid guoddi, dadjá Ina-Theres Sparrok. Son jearrá gosa sii dasto galget go bieggamillut dagáhit bozodoalu ovdi sin guovllus.

Eai dáhto vástidit

NRK Sámis gahččaleimmet sáddet gažaldagaid Oljo- ja Eneriijadepartemeantii dan hárrái maid ja movt sii dustejit boazodoallonuoraid, Norgga Luonddugáhttenlihtu, Luonddu ja Nuoraid organisašuvnna ja Norgga Sámiid Riikkasearvvi nuoraidorganisašuvnna gáibádusaid ahte bissehit bieggamillohuksemiid.

Mii oaččuimet čálalaš vástádusa Oljo- ja energiijadepartemeanta senior gulahallanráđđeaddis, Harald Eikenæs Vengenis, ja son čállá ahte departemeantas eai dáhto vádtidit maidege dál go sii leat bargamin áššiin.