Sámi áššiid stáhtačálli Ragnhild Vassvik Kalstad hástala Norgga, Suoma ja Ruoŧa guovllu eiseválddiid guorahallat makkár vejolašvuohta livččii ásahit oktasaš rájákeahtes sámeskuvllaid.
– Čoavddášii olu hástalusaid
Dákkár skuvllat čoavddášedje su mielas ollu daid hástalusaid maiguin guovlluskuvllat Sámis dál rahčet.
Kalstad čilge ahte dál váilot sámegielhálli oahpaheaddjit sihke Suomas ja Norggas. Oktasaš sámeskuvlla sáhtášii čoavdit dáid hástalusaid.
Unnit mánnálohku sáhttá dagahit ahte guovlluskuvllat heaittihuvvojit.
– Oktasaš sámeskuvlla dagašii váddáseabbon heaittihit skuvllaid, ja attášii mánáide eambbo oadjebasvuođa, Kalstad ákkastallá.
Deanuleagis buorre ovdamearka
Deanu ealáhusa ja guorahallanguovddáža beaivválaš jođiheaddji Håvald Hansen dat ohcalii ášši Ohcejoga ja Deanu oktasaš skuvlasemináras ovddit beaivvi.
Sámi stáhtačálli Ragnhild Vassvik Kalstad lohká Sirpmá ja Ohcejoga skuvllaid ovttasbarggu buorren ovdamearkan movt rájákeahtes ovttasbargu lihkostuvvá. Dál su mielas livččii buorre jurdda lávket ain ođđa lávkki, ja ásahit oktasaš rájákeahtes sámeskuvlla nu movt váhnemat guhká leat sávvan.
Ii leat dušše Deanuleagis ahte Kalstad sáhtášii jurddašit ásahit rájákeahtes sámeskuvlla. Muhto ovdal sáhttá addit ain čielgasat politihkalaš lohpádusaid, de vuos hástala guovllu eiseválddiid ráhkadit plánaid.