NRK Meny
Normal

– Ráfáidahttit bivddu vai lohku laská

Finnmárkku Opmodat (FeFo) lea mielde nášunála rievssathálddašanprošeavttas mii galggašii lasihit bivdovejolašvuođaid.

Jakt
Foto: Kai Erik Bull / NRK

Dan oktavuođas ásahit gaskaboddosaš ráfáidahtton bivdoguovlluid Finnmárkkus.

Prošeaktaáigodat galggašii čájehit sáhttá go eambbo rievssahiid báhčit jus ráfáidahttá buoremus rievssatguovlluid.

GULDAL: Rievssathálddašan prošeakta

– Ráfáidahtton guovllut

FeFo seniorkonsuleanta Einar Asbjørnsen muitala iežaset ásahan njeallje bivdoguovllu Finnmárkkus mat leat oassin dutkanprošeavttas.

Vårbilder
Foto: Jonny Ekholm

Porsáŋggus leat ásahuvvon guokte bivdoguovllu, bivdoguovlu Leirpollen ja bivdoguovlu Kjæs. Guovdageainnus leat maid ásahuvvon guokte bivdoguovllu, bivdoguovlu Spielgajávrrit ja bivdoguovlu Čunučearru.

Bivdoeriid haga

Bivdoguovlluin eai leat beaiveearit. Áidna reguleren lea ahte Čunučearru ja Kjæs bivdoguovlluin leat ráfáiduhttán muhtin guovlluid. Spielgajávrrit ja Leirpollen bivdoguovlluin eai leat ráfáiduhttán ovttage guovllu.

Hálddašanmodealla vuođđun lea ahte muhtun báikkiin leat eanet rievssahat go eará sajiin, ja ahte dáid guovlluid badjelmearri doallá ránnjáguovlluide lottiid. Guorahallan geahččá man ávkkálaš lea ráfáiduhttit dákkár buriid rievssatbáikkiid.

Gielddus 2010 rádjai

FeFo stivra lea mearridan várret guovlluid dása áigodagas 2010 rádjai. Boahtteáiggis soaitá ge šaddat nu ahte dan sadjái go bidjat beaiveeriid, de ráfáiduhttet baicca muhtin guovlluid. Dát soaitáge leat álkibun bivdiide, lohká Asbjørnsen.

Asbjørnsen lea hui duhtavaš go leat ožžon sadjái dáid dutkanguovlluid, go son oaivvilda ahte prošeakta addá hálddašeddjiide ođđa máhtu movt sáhttá hálddašit rievssaha Norggas. Dasa lassin ožžot dieđuid bivdodeattu birra ja man olu rievssahiid goddet bivnnuhis bivdoguovlluin Finnmárkkus.

Smávvafuođđobivdu Finnmárkkus lea šaddan bivnnuheabbun maŋemus jagiid. Bivdojagi 2006:s báhččojuvvui árvvu mielde juohke guđát báččon rievssat Norggas Guovdageainnu suohkanis.

– Buorre go geahččaladdet

Guovdageaidnulaš Isak Thomas Triumf lea viššalis rievssatbivdi, ja son maid dovdá guovlluid mat leat mielde prošeavttas. Son gal liiko go dákkár prošeavtta leat bidjan johtui, go maŋemus guokte jagi leat leamaš unnán rievssahat Finnmárkkus.