NRK Meny
Normal

– Olli mearihuddá

Bargiidbellodaga nubbinjođiheaddji Helga Pedersen cuiggoda sámediggepresideantta sátnegeavaheami.

Helga Pedersen
Foto: Knut Falch, Falch, Knut

Sámediggi ii beasa leat iešheanálaš davviriikkalaš sámekonvenšuvnna šiehtadallamiin. Sámediggepresideanta, Egil Olli, lohká Bargiidbellodaga ráđđehusa leat dego soađi cealkán Sámedikki ja ráđđehusa gaskii.

- Olli mearihuddá go láitá Bargiidbellodaga ja Norgga dálá ráđđehusa davviriikkaid sámekonvenšuvnna šiehtadallamiid oktavuođas. Ná oaivvilda Bargiidbellodaga parlameantaralaš jođiheaddji ja nubbinjođiheaddji Helga Pedersen

GULDAL: Pedersen cuiggoda Olli

Davviriikkalaš sámekonvenšuvnna figgamuššan lea ráhkadit oktasaš njuolggadusaid ja lágaid, mat ovdánahttet sámi kultuvrra ja servodaga.

Sámediggepresideanta Egil Olli čuoččuha ráđđehusa ja Norgga Bargiidbellodaga leat rihkkon lohpádusaid go biehttalit addimis Norgga Sámediggái iešheanálaš šiehtadallanposišuvnna go Norgga, Suoma ja Ruoŧa stáhtat álggahit šiehtadallamiid.

– Dán láhkai ráđđehus, lea dego soađi cealkán Sámedikki ja ráđđehusa gaskii ja soađi sii gal bohtet oažžut, Olli lohpida.

Helga Pedersen goitge biehttala Norgga ráđđehusa leat rievdadan politihka, iige son liiko iežas bellodatustiba sátnegeavaheapmái.