– Norgga stáhta lea guokte jagi dájuhan Ruoŧa ja Suoma, go fállá fáhkkestaga dakkár šiehtadallanvuogádaga, man ieš ovdal lea hilgon. Ná oaivvilda Norgga sámediggepresideanta Egil Olli.
GULDAL:
Norgga sámeministtar, Rigmor Aasrud, mielde Norgga Sámediggi berre oažžut guokte saji ja ráđđehusges golbma dan viđa olbmo šiehtadallansáttagottis, maid Norga áigu ásahit davviriikkalaš sámekonvenšuvnna šiehtadallamiid oktavuođas.
Aasrud mielas lea lunddolaš, ahte stáhtain lea eanetlohku šiehtadallanlávdegottis, go stáhtathan galget loahpaloahpalaččat galget váldit ovddasvástádusa.
3+2 modealla, lea seamma modealla maid Ruoŧa stáhta ovdal lea fállan. Norga goitge hilggui dan ja deattuhii, ahte Sámedikkit ja stáhtat berrejit oažžut ovttadássásaš sajádaga šiehtadallamiin. Dál leat Norgga sámeministtaris eará jurdagat ja bidjá Sámedikkiid unnitlohkui.
Šiehtadallamat maŋŋonit
Norgga láhttenvuohki lea dagahan dan, ahte šiehtadallamat sáhttet áramusat álgit juovlamánu 1. beaivve. Álgoplánaid mielde šiehtadallamat galge álggahuvvut juo mannan čavčča.
Sámekonvenšuvnna šiehtadallan lea goitge dađistaga maŋiduvvon, go Sámedikkit ja iešguđetge stáhtat eai leat leamaš ovttaoaivilis das, geat galget čohkkát šiehtadallan beavddis. Ovdal lea Suopma ja Ruoŧŧa goahcan dán proseassa, dálges Norga dagaha váttisvuođaid.
Suoma vuoigatvuohtaministtar, Tuija Brax, lea almmuhan Suoma Sámediggái, ahte son sáhttá áramusat deaivvadit easka juovlamánu vuosttas beaivve.
Suoma Sámedikki ságadoalli, Klemetti Näkkäläjärvi, mielas lea buorre go vuoigatvuohtaministtar čájeha beroštumi. Son ii goitge leat duhtavaš dasa, go šiehtadallamat maŋiduvvojit.
GULDAL: