Áššáskuhtti eisseváldit eai guoddál Sis-Finnmárkku diggegotti fanasgieddelaš Hjalmar Hansena duomu. Son lei áššáskuhtton lobiheamet bivdán luosa firpmiin Deanus, Nuorta-Finnmárkkus.
Hansen ii dohkkehan sáhkkuid ja váiddii ášši diggái. Dál lea diggi gávnnahan su sivaheapmin. Luossabivdi lea duhtavaš go su namma lea viimmat buhtistuvvon. Dát ášši lea sakka čuohcan sutnje, Hansen muitala.
– Dat lea leamaš lossat guoddit dákkár ášši ja áddet maid boasttuvuođaid olmmoš lea bargan, Hansen muitala.
GULDAL:
Nuorta-Finnmárkku bolesmeašttir, Håkon Skulstad, ja guokte guoláštanbearráigeahčči duoguštedje guokte jagi áigi (2008:s) Hjalmar Hansenis luossafierpmi, luite guokte stuorra luosa.
Dasa lassin bearráigeaččit čálle Hansenii 5.000 ruvnnu sáhkkuid, go oaivvildedje su lobiheamet bidjan fierpmi bivdui, váikko son ii lean dahkan maidige boastut dikki mielde.
– Bearráigeahččit loktejedje logi mehtera su luossafierpmi áibmui ja heŋgejedje dan. Rávdnji deaddilii fierpmi nu, ahte orui dego das livččii lean roahkki ja áššáskuhtte su dan olis, Hansen muitala.
Eai váidde ášši viidáseappot
Áššáskuhtti eiseválddit eai áiggo váidit Sis-Finnmárkku diggegotti duomu.
– Norggas lea dáhkkiduvvon olbmuide vejolášvuohta bealuštid iežaset. Bolesiid duođaštusat eai doallan dán háve. Ná muitala doaibmi bolesmeašttir, Ellen Katrine Hetta, Finnmark Dagblad-áviisii.
Nuorta-Finnmárkku politimeašttir, Håkon Skulstad, lea luomus borgemánnui. Sus ii lean vejolaš oažžut kommentárá dán áššái. Hjalmar Hansen sáhttáge dál bivdit fas oadjebas mielain.
