Duorastaga badjánii eahpeluohttámuševttohus Sámedikki ráđi ja presideanta vuostá. NSR:a Aili Keskitalo ii leat šat presideanta Norgga Sámedikkis.
– Naah ... dan gal ferten dovddastit ahte ii mannan justa mu plánaid mielde ... Mii gal leimmet gergosat stivret olles áigodaga, dadjá Keskitalo, gii lea sihke behtohallan ja veháš šlundon.
Muhto son dohkkeha bohtosa.
– Ii lean luohttámuš dasa Sámedikki dievasčoahkkimis, ja dan gal fertet dieđusge dohkkehit.
Eahpeluohttámuš
NSR:a sámediggeláirasat jienastedje sihke iežaset bušeahta, ja go dat gahčai, de maiddái Bargiid Bellodaga bušeahta.
21 áirasa jienastedje eahpeluohttámuša Keskitalo ráđi vuostá.
Duhtavaš, muhto leamaš váttis
Aili Keskitaloi ja Norgga Sámiid Riikasearvái ii leamaš beare álki stivret Sámedikki maŋemuš golbma jagi.
– Dat lea leamaš hástalussan stivret unnilogus, dan meare ucca unnitlogus mas mii leat leamaš, ja dása lea maid risiko čátnon.
Muhto Keskitalo deattuha ahte lea duhtavaš bohtosiin maid son ja NSR-ráđđi leat olahan, ja geahččá ovddasguvlui.
– Mun lean NSR:a presideantaevttohas, ja lean gearggus bargat válggaid guvlui.
Larsen: – Leamaš unohas dilli
Bargiid Bellodaga parlamentáralaš jođiheaddji Sámedikkis, Vibeke Larsen, mielas leamaš váttes dilli Sámedikkis.
– Leamaš unohas dilli go šattaimet bušeahtakriisai, gos ii lean luohttámuš ráđi evttohussii. Ii leamaš dilli maid leat háliidan, muhto Bargiid Bellodat váldá ovddasvástádusa go ii leat eará molssaeaktu stivrejupmái, dadjá Larsen, gii dál lávke presideanta stullui.
GEARGGUS: Sámedikki parlamentáralaš jođiheaddji Bargiid Bellodagas, Vibeke Larsen, ovdanbuktá ođđa ráđi bearjadaga.
Foto: Dragan Cubrilo / NRKOvdal ovcci bearjadaga iđida galgá son leat gearggus bidjat ovdan ođđa ráđi Sámediggái.
– Buot ii leat gárvvis, dál leat mannamin šiehtadallat.
Olgešbellodat ja Árja vuolgá mielde ođđa ráđđái, muhto várrepresideanta ámmáha son ii atte earáide.
– Mis galgá sihke presideanta ja várrepresideanta, dadjá Bargiid Bellodaga njunuš.
