NRK Meny
Normal

– Mun lean «festivála-modusis»

Márkomeannu festivála buvttadeaddji muitala alddis dál badjelaš guokte vahkku ovdal go Márkomeannu festivála álgá, hui hušša muhto lihkká somá. Son lohká iežas dál leat «festivála-modusis».

Anne Henriette Hætta Reinås

Márkomeannu festiválabuvttadeaddji, Anne Henriette Hætta Reinås (24).

Foto: Mathis Eira / NRK

Dán «modusa» čilge nuorra buvttadeaddji Anne Henriette Hætta Reinås (24), leat dan láhkai ahte ii šat leat dehálaš oađđit iige borrat, muhto muitá dušše káfe juhkat.

Hætta Reinås lea bajásšaddan Skániid ja Evenášši guovllus, ja lea lohpidan bargat buvttadeaddjin boahtte jagi festivála rádjai.

– Vaikko lea hui hušša ja somás áigi dál, de dattetge in soaitte leat buoremus olmmái iežan skihpáriidda, bohkosa Hætta Reinås.

Márkomeannu.

Vuorkágovva váldon Gállogiettis, Márkomeannu festivála oktavuođas.

Foto: Márkomeannu / John Henry Storhaug

Cuvket «myhtaid»

Dán jagi Márkomeanus lágida festivála ovttas Sámi Dutkamiid Guovddážiin UiT (SESAM) seminára giellaválljema birra sámi veagain, ja sávvamis cuvket myhtaid go guoská sámegiellageavaheapmái mánáiguin.

Márkomeannu festivála lágiduvvo maŋemuš vahkkoloahpa suoidnemánus Gállogiettis, Skániid gieldda Tromssas ja Evenášši gieldda gaskkas Nordlánddas.

– Boran olu «fastfooda»

Anne Henriette lohká iežas hui lihkoš, go sus leat olu viššalis ja čeahpes mielbargit festivála olis. Dat lea olu bargu ja dan geažil gártáge borrat olu oastoborramuša, dahje nu movt Amerihkás dadjet; «fastfood».

– Muhto ná unnán oađđit gal in nagot čađahit go moadde vahkku, muđui gal lea várra ahte buohccán, muitala buvttadeaddji.

Riddu Riđđu jalla somá

Váikko lea olles leavttuin bargame «iežas» festiválain, de dattetge áigu Hætta Reinås bidjat áiggi finadit dán jagi Riddu Riđđu festiválas, Olmmáivákkis.

– Riddu Riđđu lea buorre festivála. Doppe lea álo jalla somá, mun maid oahpan olu ja oaččun olu inspirašuvnna, Anne Henriette deattasta.

  • Guldal olles jearahállama dás: