NRK Meny
Normal

– Mun áiggun báhtarit lieggariikii

Son lea dolkan go geassi ii oba boađege Sápmái ja lea ge dolkan oalát dáinna čoaska gesiin. Dát geassi heađušta olbmo eallimis ja son áigu jođáneamos lágiin diŋgot mátki lieggariikii.

Syden

Sámis vulget olbmot dákkár sáttogáttiide čoaskkes dálki geažil.

Foto: Linda Pedersen / NRK

– Geasset galgá biebmat čuoikkaid, ii ge čohkkat siste ja dolastit muorraommanis. Mun in liiko veaháš ge go lea ná čoaska geassi, dadjá Guovdageaidnulaš Issát Ailo Gaup.

Gaup muitala ahte čoaska geassi lea dagahan ahte son lea buohccán.

Issat Ailo Gaup

Issat Ailo Gaup lea dolkan čoaska geassai, dál áigu báhtarit lieggariikii.

Foto: Privat

– Dán rádjai lea mu geassi leamaš ránis, mun lean leamaš maid buohcci ja lean aitto dál dearvvašnuvvan. Ja mun jáhkán dat čoaska geassi lea dagahan ahte mun lean buohccán. Ja gal dat lea juo váivi leat buohcci geasset, muitala son.

– Dál mun vuolggan

Dál áigu son vuolgit lieggariikii.

– Eskke iđđes go ledjen gáfe juhkame ja geahččame láseráigge olggos, de mun mearridin ahte dál mun báhtaran oaivegávpogii dahje eará báikái gos lea liekkas. Go mun lean duođaid váillahan geasi, lean measta jagi vuordán ahte galgá fas šaddat báhkka, muitala Issat Áilo Gaup.

Go ii leat báhkka, de ii beasa son bargat olgobargguid ja dan son váillahan.

– Mun liikon maid sihkkelastit ja go ná čoaskkis lea, na de ii leat beare somá vuolgit mánáiguin guhkibuš sihkkeltuvrii, dadjá Gaup.

Ii leat beassan bassit borramuša

Vuosttaš diŋga maid Issat Áilo áigu bargat go son olle lieggariikii, lea čohkkat olgun ja návddašit dan fiinna dálkki.

– Mun áiggun maid bassit borramuša, dan in leat beassan bargat guhkes áigái. Maŋemuš háve go mun bassen borramuša, de ledje galbmagrádat olgun ja mus lei gahpir vel alde, boagusta son.

Son lea maid dávjá jurddašan ahte Guovdageainnu galggašii guođđit ja vuolgit dakkár báikái gos lea báhkka.

– Šaddá veaháš ártet vuolgit báikái gos lea liekkas, mun in leat gal ieš okto vuolgime, mus lea sihke moarsi ja mánát mielde vel. Dáppe Guovdageainnus livčče gal ráinnas áibmu, muhto lea nu galmmas ja dasa gal dolká olmmoš. Ja dáppe leat mus maid buot lieggaommanat alde ja dat ii leat nu beare somá gal, dadjá Issat Áilo Gaup loahpas.

  • Guldal ášši:
    Aigu bahtarit liegga riikii