NRK Meny
Normal

– Muhtomin eahpečielggas guđe gahpir Varsas lea badjelis go kommentere

Sámediggepresideanta lohká iežas muhtomin imaštallat makkár oktavuođas Laila Susanne Vars vástida journalisttaide, leago Gáldu direktevran vai opposišuvdnapolitihkkárin, go lea Árjja sámediggejoavkku jođiheaddji.

Aili Keskitalo og Laila Susanne Vars

Sámediggepresideanta ii dieđe goappá gahppiriin Laila Susanne Vars vástida, Gáldu direktevrra vai Sámedikki unnitlohkopolitihkkara.

Foto: Fotomontasje / NRK

– Mun lea muhtomin journalisttain šaddan jearrat ahte gean sii leat jearahallan, Gáldu direktevra vai Árjja sámediggejoavkku jođiheaddji, Laila Susanne Vars. Ja de leat journalisttat vástidan ahte eai leat ieža leamaš nu sihkkarat. Dat muitala munnje ahte in leat dušše mun gii eahpidan su rolla, lohká sámediggepresideanta Aili Keskitalo.

– Sáhttá dagahit eahpádusa

Keskitalo dadjá ahte muhtimat sáhttet geavahit liibba hilgut Gáldu cealkámušaid ja čuoččuhit ahte Gáldus lea politihkalaš agenda ja dat ii leat su mielas buorre Gáldui iige sámi servodahkii. Keskitalo dadjá maiddái ahte dákkár dilli sáhttá dagahit eahpádusa Gáldu iešheanalaš ja sorjjasmeahttun sajádahkii.

– Jus Vars ii obanassiige oainne dan ahte muhtomin sáhttá gártat diekkárlágan rollii, de lean mun veahá eanet suorganan go ovdal lean leamaš, go de dat muitala ahte váilu muhtinlágan rollaipmárdus, ja dat ii leat vuogas.

Muhto mun in leat Vars hoavda. Lea Gáldu stivrra ovddasvástádus sihkkarastit ahte Gáldu lea sorjjasmeahttun ja ahte lea alla fágalaš integritehta. Gáldu ii leat Sámedikki orgána, muhto Gieldda- ja ođasmahttindepartemeantta orgána, ja lea sin duohken dán dárkkistit. Dan dadjá Sámediggepresideanta, Aili Keskitalo.

Čielggadan ášši bargoaddiin

– Lihkus Aili Keskitalo ii leat mu hoavda, dadjá Laila Susanne Vars ja duššindahká nu Keskitalo cealkagiid. Vars dadjá ahte su hoavda lea departemeanta ja Gáldu stivra, ja son lea ášši singuin čielggadan dalle go son virgáduvvui Gáldu direktevran.

– Lean čielggaduvvon departemeanttain dalle juo go álgen Gáldui ahte lea dainna lágiin ahte eai sáhte bágget mu heaitit sámediggepolitihkkárin dan dihte go lean Gáldu-direktevra. In váldde sámediggepresideantta cuiggodeami nu lossadin, dan dihte go lea opposišuvdnapolitihkkár. Livččii vuogas várra sutnje ahte in jietnat nu olu Sámedikki politihka oktavuođas, lohká Vars, gii ii loga gullan ovttage konkrehta ovdamearkka dasa ahte son lea mahkáš vearrut bargan Gáldus ja moktege geavahan iežas Sámedikki rolla boastut.

– Mu mielas dát šaddet čuoččuhusat maidda lea hui váttis vástidit, lohká Vars.

Lars Anders Baer

Gáldu ovddeš stivrajođiheaddji, Lars Anders Bær dadjá stivrra ságastallan juste dan duppálrolla birra go gáldu direktevra seammás lei politihkkár.

Foto: Sara Beate Eira / NRK

Ságastallan ášši birra stivrras

Dalá Gáldu stivrajođiheaddji, Lars Anders Baer, lohká stivrra ságastallan dan birra go Vars lei sámediggepolitihkkár seammásgo galggai bargat Gáldu direktevran.

– Mis lei rabas ságastallan dan birra ahte duppalrolla sáhttá buktit váttisvuođaid. Dat vuolgá maid das man profilerejuvvon lea politihkkárin. Jus doalat vuollegis profiilla, de dat dahká dán álkibun, jus doallá alla profiilla, de dahká dán váddáseabbon. Muhto jus livččii leamaš Sámedikki stivrras, de ii livčče min áigumušaid mielde. Go čohkká Sámedikkis lea dieđusge ráji nalde dan ektui ahte leago dohkálaš, muhto go Gáldu ođđasit organiserejuvvo, de ferte dieđusge ođđasit árvvoštallat, lohká Baer.

Guorahallamin rievdadusaid

Norgga Našunála olmmošvuoigatvuođaid ásahusa direktevra Petter Wille ii loga áibbas vuogasin jus rollat seaguhuvvojit. Son lohká ahte son goit ii livčče sáhttán leat sihke politihkkár ja olmmošvuoigatvuođaásahusa direktevra.

– Juste dan dili mas Gáldu lea dál, lea ášši man mii šaddat ovddasguvlui árvvoštallat, go mii han leat guorahallamin vejolašvuođa Gáldu bidjat olmmošvuoigatvuođaásahusa vuollásažžan.

Nu dadjá Petter Wille, ja lasiha ahte son lea Sámedikki dievasčoahkkima oktavuođas Kárášjogas deaivvadeamen Sámedikki presideanttain, ja beaivvi maŋŋil ges Gáldu bargiiguin. Dáin čoahkkimiin šaddá sáhka ovttastahttima birra, dadjá Wille.