NRK Meny
Normal

– Mánát vuorddašedje 40 buolašceahkis oahpaheaddji gii ii boahtán

Guokte jagi leat váhnemat ja mánát jienajávohaga dohkkehan Kárášjoga skuvlla heajos dili. Dál sii eai šat doala njálmmiset.

Karasjok skole

Váhenamat muitalit, ahte oahpahus maid Kárášjoga skuvla sin mánáide fállá lea hui nuo ja ná. Dávjá ii leat skuvla fuolahan mánáide oahpaheaddji, iige dás leat boahtán makkárge diehtu.

Foto: John Einar Jonsen Eira

– Vearrámus dáhpáhus lei ođđajagimánu 20. beaivvi diibmá. Dalle čužžo mánát olgun 40 buolašceahkis ja vuorddašedje oahpaheaddji gii ii boahtán. Dalle muhtimat fuobmájedje čuojahit ruoktot váhnemiidda, ahte eaigot sáhtášivčče sin viežžat.

Dan muitala váhnen Mona Irene Larsen. Son ja dat eará váhnemat mánáide geat dál vázzet 6B-luohkká leat dolkan ja duššástuvvan dillái mii dán luohkkás lea leamaš maŋimuš guokte jagi.

– Mii leat máŋgii cuiggodan dili, muhto skuvllas eai váldde vuhtii cuiggodemiideamet, šuohkiha váhnen Siri Linn Berg.

Váidalan gildii ja fylkkamánnii

Váttisvuođat álge guovtti jagi áigi, go mánát vázze njealját luohkká.

Dalle skuvla lonuhii luohká kontáktaoahpaheaddji, vaikko sihke váhnemat ja oahpaheaddji ieš hálidedje ahte son livččii galgan joatkit.

Dán almmatge ii dohkkehan skuvla.

Dan maŋŋá luohkás álo váilui oahpaheaddji, ja mánát fertejedje čađagaskka oahpásmuvvat ođđa sadjásašoahpaheaddjiide.

– Dat guhkemus áigodat mas mánát ledje almmá makkárge plánaid haga lei gávcci vahku, muitala Siri Linn Berg.

(Ášši joatkašuvvá video vuolde)

Tre foreldre i Karasjok intervjues om manglende skoletilbud for barna deres. Reporter er Dan Robert Larsen.

GEAHČA VIDEO: 6B luohkkás leat logi oahppi. Váhnemat lohket, ahte mánáin ii leat dat oadjebasvuohta maid galggašii sáhttit gáibidit. Govas leat: Siri Linn Berg, May-Lise Mienna, Ann Kristin Somby, Renathe Aspeli Simonsen, Mona Larsen, Toril Merete Guttorm, Jan Inge Paulsen, Rolf Gunnar Mienna ja Trine Helander-Paulsen.

Go skuvllas ja gielddas eai leat dahkan maidige váttisvuođain, de leat váhnemat váldán oktavuođa Finnmárkku fylkkamánniin.

Finnmárkku fylkkamánni lea doallan geahču skuvllas ja gávnnahan ahte Kárášjoga skuvla lea rihkkon vihtta njuolggadusa oahpahuslágas.

– Maŋŋágo mánát gerge njealját luohká de lea leamaš mearihis moivi. Mii váhnemat eat šat nagat čuovvut mielde mii skuvllas dáhpáhuvvá ja mánáid oktavuohta gaskaneaset iige leat šat nu buorre go lávii. Ovdal sii ledje hirbmat buorre joavku, muhto dál gal lea olu rikkeara. Sii šaddet mášuheamit go sadjásašoahpaheaddji ii iđis ja dalle sáhttá dáin skuvladiimmuin dáhpáhuvvat feara mii, muitala Mona Irene Larsen.

Ovdamearkka dihtii mii sáhttá dáhpáhuvvat?

– Máŋgii sáhttet mánát doarrát ja sii leat maid máŋgii báhcán okto skuvlii, čilge Larsen.

– Dát lea leamaš váttisvuohtan unnimusat guokte jagi, ja sis lea leamaš oktavuohta sihke fylkkamánniin ja skuvllaeaiggádiin Kárášjoga gielddain, muhto liikká ii dáhpáhuva mihkkige. Álo lohpiduvvo, ahte dilli galggašii buorránit, ja de sáhttá leat buoret guokte-golbma vahku ovdalgo dilli fas šaddá numo lei. Mánát masset oahpu ja sii leat šaddan čuorbbibun buot fágain. Dat lea šállošahtti, lohká váhnen Renathe Aspeli Simonsen.

– Ferten dušše šállošit

Rektor Arnulf Soleng ii searvva jearahallamii, muhto šleađgapoasttas son čilge ná manne dilli lea numo dat lea:

Rektor Arnulf Soleng

Rektor Arnulf Soleng.

Foto: Elvi Rosita Norvang / NRK

– Dán luohkás leat olu sadjásašoahpaheaddjit máŋgga fágas go bissovaš oahpaheaddjit leat guhká leamaš eret barggus buozalasvuođa geažil. Skuvllas eai leat bissovaš oahppan sadjásašoahpaheaddjit, ja danne fertejit sii geavahit oahpaheaddjiid geain ii leat oahppu, čilge Soleng.

Váhnemat muitalit, ahte guhkimus áigi maid mánát leat leamaš almmá plánaid haga lea gávcci vahku. Mo lea dát vejolaš?

– Ferten dušše šállošit go vahkkoplánat eai leat ráhkaduvvon numo gábiduvvo. Buot fágaoahpaheaddjiin lea jahkeplána mii čuvvojuvvo iešguđet fágain, ja dáid sadjásašoahpaheaddjit geavahit jus bissovaš oahpaheaddji lea guhkit áigge eret, čilge Soleng,

Váhnemat imaštit manne Kárášjoga gielddapolitihkkárat eai čájet beroštumi dán áššái.

– Gielddas han lea ovddasvástádus fuolahit, ahte dilli skuvllas lea dohkálaš. Dál ii leat dilli eisege numo galggašii. Mun in jáhke, ahte lea dušše dát okta luohkká mas leat váttisvuođat. Danne galggašedje gielddapolitihkkárat dán ášši váldit duođas, cuiggoda váhnen Siri Linn Berg.

Karasjok skole

Otne lei dán skuvlajagi nubbinmaŋimuš skuvlabeaivi ja mánát besset dál geasselupmui. Oaidnit leaš leago dilli buorránan go fas bohtet skuvlii čakčat.

Foto: Dan Robert Larsen / NRK