John Erland Boine lea badjelaš 20 jagi orron Fredrikstadas, muhto lea juohke jagi leamaš luomus davvin.
Dalle lea son geavahan dan nu gohčoduvvon "Fortealttá", ja dál lea son Vuollegeavgŋás ássanvovdnii huksemin spihkártealttá, mii lea dákkár smávva barttas ássanvovnnas gitta.
Dehálaš davvin fitnat
John Erland lea juohke geasi davvin, ja dat lea hui dehálaš sutnje. Son lea erenomážit maid čadnon dan fiinna lundui.
– Lea hirbmat dehálaš boahtit deike, jus in beasa davás geassit, de lea juoga mii váilu.
Dáppe lea nu čáppa luondu, beasat meahccái vuolgit, it dárbbaš ráiddus čuožžut ja čuvges geasseijat leat erenomáža, muitala John Erland.
Máhca mánnávuođabálgáide
John Erland lea lagabui 60 jagi, ja muitala dan ahte orro leamen nu ahte mađi boarrásat šattat dađi eanet bahkket ruoktot.
– Lea eambbo ja eambbo dehálaš deaivvadit fulkkiiguin ja lágas olbmuiguin. Jáhkán ahte lea nu sámi servodagas ahte fuolkevuohta lea hui dehálaš, dadjá John Erland.