– Luohtádus la huj ájnas

Divtasvuona rádeålmmå, Arne Kvensjø, bajedij ássjev man ájnas la suohkanstivrra ja åvddånammadusá ájrrasa tjåhkanimijda båhti gåsi li gåhtjoduvvam.

Sån javllá li njuolgadusá dán birra, ja gájbbet dábijt politihkkárij gaskan.

– Suohkanlágan tjuodtju politihkkára vierttiji tjåhkanimijda boahtet, jus dal ælla siera sivá manen e máhte boahtet, javlaj Kvensjø suohkanstivrratjåhkanimen.

Sån mujttádahtij álmmuga luohtádusáv gå li dal politihkkárin válljidum, ja dættot politihkkára li åvddågåvå.

– Luohtádus politihkkárijda la guovddelin, javlaj Arne Kvernsjø, gut aj nammadij jasskavuodav.

Duodden aj mujttádahtij politihkkára li barggovadde suohkana barggijda.

– Suohkanstivrra mij ij dåjma sebrudagáv vájkkut.

• Lågå aj: – Ålos li sjávot årrum ietjas sámevuoda birra. Muddo l dal giehttogoahtet.

– Ájrrasijs binnu ja binnu

Suohkanoajvve Tor Asgeir Johansen tjielggi ássje åvddån bådij duola dagu danen gå vásse vahko lij åvddånammadustjåhkanibme Divtasvuonan, ja gålmås vihtta ájrrasijs ettjin dán tjåhkanibmáj boade.

– Ájge tjadá lip vuojnnám ájrrasijs binnu ja binnu tjåhkanimijn. Dajnas åvddånammadusán dágástallam badjánij, ja de mierredijma hæhttup mujttádahttet man ájnas la tjåhkanimijda boahtet, javllá Johansen.

– Dát ham álmmuga luohtádusáv politihkkárijda laset, gå politihkkára tjåhkanimijda båhti ja åvdåsvásstádusáv válldi.

• Lågå aj: Åhtsål sáme kultuvralasj skåvllåvuossav