– Áigi maŋŋágo Guoládaga Sámi Radio doaibma nogai lea munnje leamaš oalle buorre áigi. Fitnodagas ledje oainnat nu olu stuorra váttisvuođat. Ruhtadilli lei lossa noađđin munnje. Danne lean beassan bosádastit maŋŋágo heiten doppe, čilge Guoládaga Sámi Radio ovddeš váldodoaimmaheaddji Aleksandr Paul.
Guoládaga Sámi Radio (GSR) vuođđuduvvui muhtin jagi áigi sierranas prošeaktan. Áigomuš fitnodagain lei ráhkadit radiofálaldaga Guoládaga sápmelaččaide iežaset gillii.
GSR ražai ruđalaččat
Lujávrri guovllu stáhtaadvokáhtta ásahii diibmá ášši GSR váldodoaimmaheaddji vuostá go fitnodat ii lean moatti mánnui máksán bálkkáid bargiidasas. Vaikko Aleksandr Paul lei iešge okta dain gii ii ožžon bálkká, de válljii stáhtaadvokáhttá lihcut su jahkái jođiheaddjin cuoŋománus jagis 2010.
GSR váldooamasteaddji lei Sámiráđđi ja jurdda lei ahte fitnodat ieš livččii galgan diinet eanaš doaibmaruđaidis go vuvdet radio- ja TV-áššiid davveriikkalaš sámi mediafitnodagaide. Dát vuogádat almmatge ii doaibman.
Aleksandr Paul čállá dán áigái eanaš sámegiel ođasáviisii Ávvirii.
Foto: Dan Robert Larsen / NRKAleksandr Paul válljii ieš guođđit váldodoaimmaheaddjibarggu beaivvát ala ja lea das rájes eallán luođojournalistan. Sus lea lagaš ovttasbargu ovddeš virgeguimmiinis, Jevgenij Kirillov.
– Dat gal lea hirbmat somás bargu go mun beasain ain journalistihkain bargat ja dat lea hirbmat vuogas, go dálhan eai leat dárkkistanorgánain makkárge gažaldagat munnje. Dál in dárbbaš šat fitnat doppe stáhtaadvokáhttakántuvrras dahje vearrokántuvrras. Dálhan in dárbbaš šat dieidguin dádjut, šuohkiha Paul.
Nu ahte don beasat dál eambbo luđolaččat ja friijasit bargat go ovdal?
– Guoládaga Sámi Radio lea álo, nu guhká go mun lean doppe bargan, leamaš fitnodat mii bargá luđolaččat journalistihka dáfus. Eat leat dárbbašan geasage rapporteret maid mii bargat ja geasa mii ráhkadat reportášaid ja áššiid. Dál lea almmatge munnos Jevgenij Kirillovain buorre dilli, muitala Paul.
– Buorre ovttasbargu Ávviriin
Paul ja Kirillov leaba álggahan ovttasbarggu sámegiel ođasáviissain Ávviriin. Dohko soai jeavddalaččat čálliba sihke reportášaid ja ođđasiid.
Aleksandr Paul ii loga váttisin vuovdit áššiid áviisii, vaikko áviissain leage dál lossa ekonomalaš dilli earret eará go unnit aht` unnit olbmot ostet bábiráviissaid. Eambbo aht` eambbo olbmot oainnat baicce lohket ođđasiid interneahta bokte.
– Eai munnos leat stuorra váttisvuođat jođihit iežame čállosiid, go jáhkán munnos bohtet dakkár áššit maid olbmot háliidit lohkat. Dat leat buorit áššit, stuorra ja dehálaš fáttáin, navdá Paul.
(Čálus joatka gova vuolábealde)
Jevgenij Kirillov barggus filbmemin NRK Sápmi ovddas.
Foto: Dan Robert Larsen / NRKDan beaivve go NRK Sápmi háleštii Guoládaga Sámi Radio ovddeš váldodoaimmaheaddjiin, de lei son ráhkkaneamen Ávvirii ráhkadit reportáša boahtte vahkkoloahpa Lujávrri geasseriemuid birra.
– Dat lea juogalágán suollemas ášši. Danne in sáhte dán birra nu olu muitalit, lohká Aleksandr Paul ja mojohallá.
Son rámida ovttasbarggu mii sus lea áviissain ja lohká Ávvira olbmuiguin álki gulahallat. Sus lea almmatge okta stuorra sávaldat boahtte áigái.
– Diehttelasat lea hirbmat suothas bargat televišuvnnain. Danne livččii vuogas jus beasašeimme fas eambbo bargagoahtit dainna ja doaivvun fas dán áiggi boahtit, sávvá Aleksandr Paul.
