– Bielleoasse lippajs jiervas båråduvvin

– Moadda lippa lip massám. Maŋemus ájge moadda lippa juohkka biejve gáhtu. Binnemusát 40-50 lippa lip massám, javllá Trond Olsen Sálatvuomen.

Sån tjuottjot jiervva la lippajt gåddåm.

– 6-7 jierva hæhttuji vuotjeduvvat, bivdde li juo dájna álggám. Urudisá e galga guohtomguovlojn liehket, e nágin saje Vuonarijkan.

• Lågå aj: Første gaupe skutt i Tysfjord på over 30 år

Vuojnij niellja jierva

Tron Olsen lij sávttsaæjgát ja dálla suv bárnne båndorsijdav jådet, valla vádtsá vilá várijt bárne åvdås.

– Guokti-gålmmi vahkkuj váren lip váttsatjam, ja sávtsa li dá giesev jasskat guohtom. Valla guokta vahko dás åvddåla sávtsa labudahttegåhtin ja lippa gáhtun. De vuojnijma niellja jierva, dijkko gålmmå tjivgaj.

• Lågå aj: Unge vil ha mer vern av rovdyr

Varran

Sån subtsas aj gå sávtsa varran ruopptot båhtin.

– Akta sávttsa tjoamodisán ja nisken lij gáskeduvvam gå várresijddaj bådij, ja ietjá bále lij libba ållu varran. Tjielgas la munji jiervatjivga lippajt li bårråm.

– Ehpit gus dáv bierri gierddat?

– Ep. Gå mån 40 jage dás åvddåla sávtsaj álggiv de sávtsa dalloj aj váren lidjin. Valla ittjiv álu ielve lippa urudisájs váldeduvvin. Ienemusoase lippajs vat sijddaj båhtin, vásstet Olsen.

• Lågå aj: Ruovdderahtedåjmadahka hæhttu jerajt tsieggit

Oadtju vuohtjet

Fylkkabirásjådediddje Roar Høgsæt dán dáhpádusá birra la gullam, ja diedet guokta båndorsijda Sálatvuomen li moadda lippa massám.

– Vuostatjin bånndura biednigijt oadtjun váj bessin sávtsajt gehtjastit. Valla sij dálla oadtju jiervajt vuohtjet ietjas guovlon.

Ietján ráfálasj ájgge

Fylkkabirásjådediddje diedet ietján fylkan la ráfálasj ájgge.

– Ep la vargga nágin diedádusájt bånndurijs oadtjum. Dá jage dåssju gallegasj sávtsa li urudisájs váldeduvvam.

• Lågå aj: Návti le ællosámij almma barggobiejvve