NRK Meny
Normal

– Lea dan luste faageprieviem åadtjodh

Nieljie learohkh Noerthe-Trøøndelagesne faageprieviem åådtjeme daan våhkoen.

Lærlinger

Raavrhvijhken tjielten åejvie Hans Oskar Devik, Berit Ellen Jåma, Toamma Thomasson, Elen Kristina Utsi, Sanne-Marja Utsi, fylhkenraerie Mai-Britt Lagesen jih Namsskogan tjielten åejvie Stian Brekkvassmo

Foto: Kjell Roger Appfjell / NRK

Nieljie saemieh jååktan åadtjoejin faageprieviem Noerthe-Trøøndelagesne.

Fylhkenraerie Maj-Britt Lagesen lij dihte gie prievide vedti Ellen Kristina Jih Sanne-Marja Utsise gïeh lægan duedtie vaalteme. Toamma Thomasson jih Jon Henrik Jåma åådtjeme prieviem båatsoelearohken åvteste.

– Manne göökte jaepieh barkeme dejnie. Manne nejpie jih ovmessie plijrehtahkh dorjeme. Daate gujht joekoen luste. Manne leam «faglært», Elen Kristina Utsi jeahta.

Dïhte gïehtelamme garreduedtine, jih lea madtjeles dïhte faageprieviem åådtjeme.

– Hijven gujht domtoe, daelie manne sïjhtem vihth vuelkedh barkedh. Manne tuhtjem lea dan luste.

Myövhkeduedtie jih båatsoefaage

Elen Kristinan stoerreåabpa, Sanne-Marja Utsi, aaj faageprieviem vaalteme, mohte dihte myövhkeduedtesne veelti.

– Daelie gujht domtoe gaajh buerie, jih luste faageprieviem daebpene aaj Tråantesne gosse lea stoerreluhkie jaepieh heevehtimmie, Sanne-Marja jeahta.

Dïhte lea gïehtelamme skåerrine, gaamesigujmie jih goelkegaamegh gååreme.

– Goltelieh mannem daelie

Eah leah dan jïjnjh almetjh gie lea faageprieviem båatsoefaagesne vaalteme. Mohte Toamma Thomasson lea akte dejstie.

– Daelie maahtam almetjidie soptsestidh jis dåeriesmoerh sjædta gosse leam vaeresne jallh giedtesne ahte mov lea faageprievie, nimhtie datne maahtah mannem govledh, Toamma föörhkede.