NRK Meny
Normal

– Kristtalaččat galggašedje veahkehit báhtareddjiid

– Girkui lea dehálaš veahkehit olbmuid, geat ihkenassii sii ležžet. Danne veahkeha girku báhtareddjiid, seammá makkár oskusuorgái dal gulašit, lohká Tore Johnsen.

Tore Johnsen

Sámi Girkoráđi váldočálli Tore Johnsen muittuha olbmuid leahkit váibmoláđđásin ja veahkehit báhtareddjiid geat gillájit vartnuhis dilis.

Foto: Åse Pulk/NRK

– Dát lea kristtalašvuohta beaivválaš ealimis, dadjá Sámi Girkoráđi váldočálli Johnsen.

  • Ášši Tore Johnseniin gulat vuolemusas dán siiddus

Olbmot galggašedje veahkehit guhtetguimmiideaset, eai dušše kránnjáid ja lagašolbmuid, muhto buot olbmuid, oaivvilda son.

– Danne Norgga Girku bukta cealkámušaid báhtareddjiid áššiide, maid muhtin poletihkkalaš bellodagat eai liiko. Girku ja kristtalaččat eai sáhte orrut jienajavohaga go oidnet ja gullet mo muhtimat láhttejit báhtereddjiiguin.

Ipmeláhčči geatnegahtti buohkaid veahkkáivuhtii

Johnsen lohká mii buohkat fertet čájehit váibmoláđisvuođa guhtetguoibmáset ja ráhkistit lágamuččaid. Veahkehit ferte maid olbmuid geat eai leat seamma oskkus.

Son fuopmášahttá biibbalhistorjjás veardádusa váibmoláđis Samarialaččas, son lei amas olmmoš gii čájehii dan lagamuš ráhkesvuođa.

Den barmhjertige samaritan

Bibbalhistorjjás govva váibmoláđis Sámarialaččas. Veardádus mas Jesus hállá ja Biibbal čállá.

Foto: Høgskolen i Oslo

Ja muittuha ahte mis Norggas lea maid geatnegasvuohta veahkehit olbmuid máilmmis, ja kristtalaččat galget muitit ahte buot máilmmi olbmot leat vuolggahuvvon seamma sivdnideaddjis.

– Danne Ipmeláhčči geatnegahttá min buohkaid leahkit váibmolađđásin ja veahkehit olbmuid geat gillájit báhtareaddji dilis.

Norgga Girku veahkeha báhtareddjiid

– Jos dal vel muhtimat moitetge Norgga Girku ovddastedjiid go seaguhit iežaset dasa mo norgga njunošpoletihkkárat meannudit báhtareddjjiid áššiiguin, de ávžžuha Norgga Girku norgga eiseválddiid bidjat olmmošárvvu bajimužžii go meannudit báhtareddjiid dili ja dorvo-ohcciid áššiid. Kristtalašvuohta geatnegahttá Norgga Girku dahkat dan, lohká Sámi Girkoráđi váldočálli Tore Johnsen.