Hopp til innhold

– Illudan unnidit ovdagáttuid

Golbma finnmárkolačča ja okta nieida Davvi-Romssas eret leat ođđa ofelašjoavku.

Årets veivisere

Ođđa ofelaččaid lea ráđđehusa sámiáššiid stáhtačálli, Anders J. Bals, ge juo beassan dearvvahit (Gurut ravddas) Ofelaččat leat Anne Berit Pulk, Sara Marja Utsi, Yvonne Marie Miniggio ja Jon-Christer Mudenia.

Foto: Vaino Rensberg / NRK

Sii geat jagi galget johtit skuvllaid ja ásahusaid mielde leat:

•Sárá Márjá Utsi (20), Deatnu
•Yvonne Marie Miniggio (24), Návuotna
•Jon-Christer Mudenia (19), Deatnu
•Anne Berit Pulk (19), Guovdageaidnu

Sámi ofelaččat lea fálaldat, mas njeallje sámi nuora logaldallet sámiid birra. Ofelaččat johtet viidát deaivvadan dihte eará nuoraiguin ja sii fitnet skuvllain ja eará arenain gos leat nuorat.

Mihttomearrin lea lasihit álbmogis máhtolašvuođa sámi kultvrra birra.

Sara Marja Utsi lea ilus go beassa leat mielde unnideamen ovdagáttuid ja diehtemeahttunvuođa sámiid birra.

– Mon ohcen dán ofelašdoibmii go dát orui leamen miellagiddevaš hástalus, ja go háliidan earáide oahpahit min kultuvrra birra ja nu leat mielde unnideamen ovdagáttuid sámiid birra, lohká Utsi.

Ofelašdoaibma lea Sámi allaskuvlla ja Gieldda- ja ođasmahttindepartemeantta (KMD) ovttasbargu. Doaimma ruhtada departemeanta. Sámi allaskuvllas lea doaimma fágalaš ja hálddahuslaš ovddasvástádus.

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.