NRK Meny
Normal

– Ii buorre jus mánát masset sámevuođaset

Ii leat buorre jus sámi mánát masset sámivuođaset go váhnemat earránit.

Aili Keskitalo
Foto: Norske Samers Riksforbund

Nu lohka Norgga sámedigge presideantta Aili Keskitalo gii mieđiha ahte lea leamaš unnán sáhka sámemánáid vuoigatvuođaid birra go váhnemat earránit. Muhto son vuohttá ahte dát lea ášši maid dál berre vuoruhit.

– Dál lea áigi ahte dát áššit maid bohtet dan politihkalaš agendaid maid, dadjá Keskitalo.

Ballet mánáid massit sámi gullevašvuođaset

Sámi áhčit geain leat mánát rivguiguin leat ásaheamen searvvi go vásihit ahte máná sámeduogáš ii váldo vuhtii go galgá mearriduvvot goappá váhnema luhtte mánná galgá orrut go váhnemat earránit.

Sii ballet mánáid massit sámi gullávašvuođaset

– Sámi mánát masset sámivuođaset

Giitevaš go áhčit dál čalmmustahttet ášši

Fágaolbmot bearassuodjalusas ja diggegottis maid ohcalit eanet digaštallama áššis. Mánáidáittardeaddjái lea dát amas váttisvuohta.

Norgga sámediggepresideantta Aili Keskitalo lea giitevaš go sámi áhčit dál háliidit čalmmustahttit ášši.


– Sámediggi sáhttá váikkuhit dasa ahte dát hástalusat bohtet agendai, omd. go sii gulahallet guovddášeisseválddiiguin sámemánáid vuoigatvuođaid birra leaš dal justiministtar dahje earát geat leat mielde hábmeme Norgga riektevuogádaga, dadjá Keskitalo.

– Ii dárbu láhkarievdadusaide

Ii ge loga oaidnit dárbbu láhkarievdadusaide go sámemánáid vuoigatvuođat leat juo suddjejuvvon earret eará mánáidkonvenšuvnnas.

– Son jáhkká ahte livččii ávkin Sámediggái ja juste daid sámemánáide ja sámeváhnemiidda ahte sii ožžot eambbo fokusa ja ságastallama dáid áššiid birra.

Háliidivččen áinnas gulahallat dáinna ođđa organisašuvnnain gullat mot sii jurddašit ahte mot Sámediggi sáhttá leat veahkkin oažžut fuomášumi dáid hástalusaide, dadjá Keskitalo.

Ovttaoaivilis Keskitaloin

Ellinor Marita Jåma

Oarjes saemej Gielh opposišuvdnapolitihkkár Ellinor Marita Jåma, lea ovttaoaivilis Keskitaloin.

Foto: Dan Robert Larsen / NRK

Oarjes saemej Gielh opposišuvdnapolitihkkár Ellinor Marita Jåma, lea ovttaoaivilis Keskitaloin.

– Dát lea juoga mii lea dehálaš sámediggái, dát han lea sámemánáid vuoigatvuođaid birra, mánáid riekti bajásšaddat sámekultuvrras ja ovdánahttit sin iežaset identitehta.

Dat lea čájehuvvon ahte dat mánát mat leat šaddan fárret eret sámeguovlluin masset dán vejolašvuođa, ja de masset juoga mii lea hui divrras sin mánnávuođas, dadjá Jåma.