NRK Meny
Normal

– Doarjja ii bisset eretfárrema

Unjárgildii ii leat gal 83000 ruvnna doarvái bissehit eretfárrema gielddas, oaivvilda Unjárgieldda sátnejođiheaddji Inger Katrine Juuso.

Inger Katrine Juuso
Foto: Nesseby kommune

Gielda- ja guovlodepartemeanta lea áiddo lohpidan 50 milliuvnna ruvnnu 71 geafes gildii. Daid searvái gullá Unjárga go doppe maid njeadjá olmmošlohku.

Guovdageaidnu oažžu 54.000 ruvnnu, ja Gángavihka 98.000 ruvnnu.

GULDAL:Unnán bissehit eretfárrema

Davvnjárgii eanemus

Davvenjárgga gielda oažžu gis badjel 1,7 milliuvnna ruvnnu, mii lea dat stuorámus juolludeapmi daid gielddaid gaskkas mat gullet dan golmma davimus filkii.

Honningsvåg
Foto: Atle Markeng / NRK

Ruhta galggašii sihkkarastit ahte gieldda bálvalusaid eai dárbbaš heaihttihit, vaikko vel olbmot fárrejitge eret.

Eanet fárren - eanet ruhta

Gielddat oainnat manahit ruđa jos olbmot fárrejit, danne go gielddat ožžot stáhtadoarjaga dan mielde man ollu olbmot leat.

– Dát erenoamáš doarjja galgá buhtadit dan maid gielddat masset eretfárrema geažil. Mađe eanet olbmot fárrejit, dađe eanet doarjja lea fidnemis, lohket Gielda- ja guovlodepartemeanttas.