Gielda- ja guovlodepartemeanta lea áiddo lohpidan 50 milliuvnna ruvnnu 71 geafes gildii. Daid searvái gullá Unjárga go doppe maid njeadjá olmmošlohku.
Guovdageaidnu oažžu 54.000 ruvnnu, ja Gángavihka 98.000 ruvnnu.
Davvnjárgii eanemus
Davvenjárgga gielda oažžu gis badjel 1,7 milliuvnna ruvnnu, mii lea dat stuorámus juolludeapmi daid gielddaid gaskkas mat gullet dan golmma davimus filkii.
Ruhta galggašii sihkkarastit ahte gieldda bálvalusaid eai dárbbaš heaihttihit, vaikko vel olbmot fárrejitge eret.
Eanet fárren - eanet ruhta
Gielddat oainnat manahit ruđa jos olbmot fárrejit, danne go gielddat ožžot stáhtadoarjaga dan mielde man ollu olbmot leat.
– Dát erenoamáš doarjja galgá buhtadit dan maid gielddat masset eretfárrema geažil. Mađe eanet olbmot fárrejit, dađe eanet doarjja lea fidnemis, lohket Gielda- ja guovlodepartemeanttas.