NRK Meny
Normal

– In jáhke nu váralaš cunamibáru

Geologat ballet Gáivuona Nuorašváris sáhttá luovvanit bákti mii de dagaha váralaš cunami Ivgovutnii.

Ivgovuotna Ivgomuoŧkki guvlui
Foto: Klemet Anders Sara / NRK

Muhto Ivgomuoŧkilaš Magnar Fjellstad ii jáhke dan šaddat nu váralažžan go várrevielti ii leat dakko nu ciekkus, dušše 30-40 grada.

– Go dieppe luovvana, de ollu bázašii juovvan dan várregilgii, ja nu ádjánivčče njirran moadde minot ovdal olle merrii, lohká Fjellstad.

GULDAL: Leaikkastallet cunami birra

Bákti lihkastan

Maŋimuš dieđut Gáivuona Nuorašvári birra, lea ahte golggotmánu rájes diibmá lea ráhku viidon beannot centimehterin.

Jus dát bákti, mii le oktiibuot 11 milliovnna guđahasmehtera stuoris, luovvaneaš ja fierrala merrii, de balahit geologat dan vuolggahit 45 mehter allosaš báru.

– Ii nu stuoris

Muhto Fjellstad oaivila mielde de cuovkana bákti dađistaga ja boađášii vulos njirranhámis mii ii dagat nu stuorra báru.

Norgga geologalaš instituhtta lea huksen mihtidanstášuvnna Nuorašvárrái, mii lea Olmmáivákki ja Ivgobađa gaskkas Gáivuona suohkanis.

Jagis beannot centte

Maŋimuš beivviid leat dollon álbmotčoahkkimat sihke Ivgus, Gáivuonas ja Omasvuonas gos leat čilgen mo dán rádjái várrestealli lea lihkadan. Geologat leat gávnnahan ahte várrestealli luoddaneapmi lea sturron beannot centimehtariin diimmá golggotmánu rájes.

Magnar Fjellstad lea orron 33 jagi Ivgomuotkkis, ja ovdal dán, Gáivuonvákkis gos muitala ahte ballu lei seamma doppe go dál Nuorašváris, muhto ii dat ge šaddan nu vearrái go balahedje.

Váralaš Ivgomuotkái

Go oktii goas nu oassi Nuorašváris luovvaneaš, de dagahivččii eanemus vahága Ivgomuotkái mii lea nuppebeal vuona.

Magnar Fjellstad muitala ahte leat eanaš nissonolbmot geat ságastallet dán birra, muhto mieđiha ahte ieš maid jurddáša dan birra dalle go gullosto juoga dán birra mediain.