NRK Meny
Normal

– Heahpat go goađi eai divo

Romssa Universitehta sámi symbola, Juho Niillasa darfegoahti mii lea Universitehta šiljus, lea billašuvvamin. Universitehta vuosttas amanuensa, Lill Tove Fredriksen, imašta manne ásahus ii divo goađi

Lill Tove Fredriksen Joho Niillas goađi oggobeal.

Romssa universitehta vuosttas amanuensa sámi girjjalášvuođas, Lill Tove Fredriksen ávzzuha universitehta divvut Juho Niillasa goađi.

Foto: Mariela Idivuoma / NRK

– Goahti buktá oidnosii sámi kultuvrra ja nanne dan árvvu ja danne lea heahpat go eai áimmahuša dan buoret, lohká Fredriksen

Juho Nillasa darfegoahti lea Romssa Universitehta šiljus sogiid gaskkas. Dat lea Universitehta vuosttas sámegielprofessor Juho Niillas, Nils Jernsletten rohki gudnin.

Doallat profiilla

Lill Tove Fredriksen

Lill Tove Fredriksen mielas massá universitehta iežas sámi profiilla jos ii váldde vára Juho Nilillasa goađis.

Foto: Mariela Idivuoma / NRK

Universitehta vuosttas amanuensa sámi girjjálašvuođas Lill Tove Fredriksen mielas ii leat goahti dan dilis ahte dat dohkke symbolan. Earret eará lea goađi siste šaddagoahtán guobbarat, čilge son.

– Romssa universitehtas lea ovddasvástádus sámi ja álgoálbmot oahpahusaide, danne livčče lunddolaš ahte universitehta maid iežas profiilla doallá, ii dušše sániiguin muhto maid daguid bokte, Fredriksen.

Son maid lohká ahte gođiin maid livčče ulbmil muittus atnit Juho Niillasa ja su bargguid.

– Ii leat vuogas

Runar Myrnes Balto

Sámediggeráđi politihkkálaš ráđđeaddi, Runar Myrnes Balto.

Foto: Åse Pulk/NRK

Sámediggi ge lea beroštišgoahtán dán áššis. Sámediggeráđi politihkalaš ráđđeaddi, Runar Myrnes Balto, ii loga leat vuogas ahte Juho Niillas goahti lea billašuvvamen.

– Sámedikkis leat digaštallan ášši juo veahá ja oaivvildat ahte go juo Juho Niillas dán láhkai lea gudnejahttojuvvon iežas doaimmaid ovddas, de berre gal maid universitehta buoret váldit vára goađis, lohká son.

Boahtte háve go Sámediggi deaivvada Romssa universitehtain de áigot dán ášši birra gulaskuddat.

– Heajos oamedovdu

Anne Husebekk

Romssa Universitehta rektor, Anne Husebekk, lohká iežaset áigut divvut Juho Niillasa goađi.

Foto: Jørn Inge Johansen / NRK

Romssa Universitehta rektor Anne Husebekk lea dán čavčča dávjá deattuhan man deháláš sámivuohta ja sámegiella lea sin doibmii.

Son mieđiha ahte sus lea heajos oamedovdu, ja áigu bearraigeahččat ahte Juho Niillasa goahti dál divvojuvvo.

– Mis leat dađi bahát oalle olu sierranas huksenbarggut dál, ja de eai leat huksenossodagas vel ollen dan muddui ahte doaimmahit goađi diviheame, muhto dát lea juoga maid sii áigot čađahit farggamusat, čilge Husebekk.