NRK Meny
Normal

– Goappátjij gielajda galggá galbbiduvvat

Divtasvuona suohkanoajven ælla makkirik plána vuosstáj válldet gájbbádusáv gádodittjat sáme bájkkenamájt Davve-Divtasvuonan kártajs ja galbajs.

Tor Asgeir Johansen

Divtasvuona suohkanoajvve Tor Asgeir Johansen duodas Divtasvuonan galggá galbbiduvvat sihke dárruj ja sábmáj, aj Davve-Divtasvuonan.

Foto: Sander Andersen / NRK

– Vuonarijkan la moalgedimfriddjavuohta ja muv villáj årrus dat sijá vuojnno. Valla almulattjat galggá galbbiduvvat goappátjij gielajda. Dat la de tjielgas.

Dav dættot hálvva iesen suohkanoajvve Divtasvuonan, Tor Asgeir Johansen tjielggasit.

Dav sån javllá dasi gå soabmása ájnegis ulmutjijs ja siebrijs li Divtasvuona suohkanij girjev tjállám gånnå gájbbedi sáme bájkkenamá Davve-Divtasvuonan gádoduvvi almulasj kártajs ja galbajs.

Sij aj vuosstálassti plánajda galbbigoahtet guovtegielak galbaj E-6 rahte milta Davve-Divtasvuonan ja gåhttju suohkanav dajt plánajt ruoptus giesset.

Girjje sáddijiddje tjuottjodi sáme bájkkenamá Davve-Divtasvuonan ælla namá dålutjis valla dálásj ájges ja dá bájkkenamá li dagáduvvam. Sij aj tjuottjodi Davve-Divtasvuonan ælla dábe bájkkenamájt sábmáj nabddet.

Girjjesáddijiddje duogen lulu vihtta siebre ja 74 ájnegis ulmutja.

Valla muhtema sáddijiddjijs tjuottjodi siján ælla makkirik dahkamusá dájna girjijn.

Odd N. Jensen, Kjøpsvik

Gásluovta, Benasuollu ja Gielkáluovta suohkanbájkkenammadusá jådediddje, Odd N. Jensen ij la dudálasj gå girjev suohkanbájkkenammadusá namán li suohkanij sáddim majt suohkanbájkkenammadus ij la vuojnnám ja dåhkkidam.

Foto: Ingar Skogvold

– Ep la de mij makkirik girje vuolláj tjállám. Dájna dåssjen adni suohkanbájkkenammadusáv. Jus mijá vuojnov ássjáj hálijdi de lidjiv vuorddám mijáj lidjin guládallat, valla ij de dåhkki návti mijá åjvij badjel barggat, javllá Gásluovta, Benasuollu ja Gielkáluovta suohkanbájkkenammadusá jådediddje, Odd N. Jensen.

Ávkke ja birás álkkádussiebrre ja Rábekjuvso ednamæjgátsiebrre aj duosstu sij la dán girje vuolláj tjállám.

Divtasvuona suohkanoajvve javllá sån la ælvvám boahtám li vuollájtjállem kampánja ja girje li tjáleduvvam suohkanij.

– Valla Divtasvuona suohkan le sámegiela háldadimguovlon ja dáppe le sáme kultuvrra ællás kultuvrra. Ja dan diehti le munji luondulasj galba aj sámegiellaj galggi boahtet, javllá Tor Asgeir Johansen.

– Galba galggi goappásj gielajda

Divtasvuona suohkanoajvve aj dættot man ájnas le jut galba båhti goappátjij gielajda.

– Mij galggap váttugis láhkáj barggat vaj galba båhti sihke dáro- ja sámegiellaj. Valla sáme galba galggi sadjáj Divtasvuona suohkanin, dav de galggi, javllá Johansen.

Johansen aj dádjat jus divna e dåbdå dájt sáme bájkkenamájt.

– Mij vierttip mujttet histåvråv, ja soajttá la mælggat dat rájes gå namá lidjin anon. Så dan diehti littji akta ja guokta buolva gudi ælla oahpástuvvam dájda namájda. Valla huoman galggap galbbit goappásj gielajda, dáro- ja sámegiellaj. Ja mån jáhkáv dát dágástallam ruvvaláhkáj de vássá.

–Ælla dagádum bájkkenamá

Ij ga Stáhta nammadievnastus tjuovo girjjesáddijiddjij tjuottjodusáv sáme bájkkenamá Davve-Divtasvuonan li ådå namá ma dálla li dagáduvvam.

Kåre Tjihkkom

Stáhta nammadievnastusá bájkkenammakonsulænnta, Kåre Tjihkkom.

Foto: Harrieth Aira / NRK

– Ælla aktak dájs namájs majt mån dánná listan dála vuojnáv ådå dagádum bájkkenamá. Muhtema dajs li luojkadum dárogielas, iehtjáda vas li oalle dålusj sáme bájkkenamá. Ja soabmása li namá ållu dålutjis, javllá bájkkenammakonsulænnta Stáhta nammadievnastusán, Kåre Tjihkkom.

Sån sievet juo jagen 1601 vuostasj sáme værromákse Rábekjuovso-guovlon tjáleduvvin værromáksemlistajda

– Dán guovlon li oalle dålusj sáme namá ma li anon, ja dajt professor Just Knut Qvigstad juo jagen 1938 duodastij, javllá Tjihkkom.