Ovdamearkan guovdageaidnolaččat eai beasa šat johttit dološ máđiid mielde Kárášjoga eatnamiid čađa ealgabivdui iežaset bivdoguovlui Guovdageainnu suohkanii nugo dássážii.
Kárášjoga sierralohpelávdegotti jođiheaddji, Eli Julianne Dalseng, sivahalla dás Kárášjoga ealgabivdinsearvvi, vaikko searvi ii leatge jietnadan dán áššis maidige.
– Olggobeale olbmot sáhttet gal ohcat sis bievlavuodjinlobi, muhto sii eai mieđit lobi johttit njealjejuvllagiiguin Kárášjoga ealgabivdoguovlluid čađa, go báikkálaš ealgabivdinsearvi lea váidán dán ášši, Dalseng.
GULDAL:
Kárášjoga ealgabivdinsearvvi jođiheaddji, Jan Idar Somby, ii goitge loga iežaset váidán dán ášši. Son lohká ovttaskas ealgabivdiid reageren.
Finnmárkku fylkkamánni birasgáhttenhoavda, Jostein Fløgstad, mielas gielda lea meaddán dán mearrádusas.
– Mohtorjohtolatlága mielde gielddas lea iešmearridanváldi bievlavuodjinlobiid juolludeamis. Gielddaid sierralohpelávdegottit sáhttet maid hilgut ohcamušaid, muhto olggobeale ja báikki olbuid ohcamušaid ferte meannudit seamma láhkai.
Kárášjoga sierralohpelávdegotti jođiheaddji, Eli Julianne Dalseng, ii loga iežas dovdat mohtorjohtolatlága.
– Justa dien lága son ii leat gal nu geahčadanm, muhto ealgabivdinsearvi lea cealkán sidjiide, ahte ealgabivdoguovlluid gaskkas lea issoras johtolat, Dalseng čuoččuha.