NRK Meny
Normal

– Gean guolástusministtar ovddasta?

Finnmárkku fylkkagieldda ovddeš várresátnejođiheaddji, Arne Pedersen,
imaštallá dan, gean guolástusministtar ovddasta, go son vuostálastá Riddoguolástuslávdegotti árvalusa.

Arne Pedersen
Foto: Nils Henrik Måsø / NRK

- Jus Bargiidbellodat vuostálastá Riddoguolástuslávdegotti árvalusa, de son ii loga iežas šat oppa dovdatge dan bellodaga, man aktiivvalaš lahttun son lea leamaš 35 jagi, Pedersen lohká.

Arne Pedersen oaivvilda buot sosialademokráhtaid berret bátnegáskkiid doarjut Riddoguolástuslávdegotti árvalusa.

GULDAL: Gean guolástusministtar ovddasta?

Lávdegoddi lea árvalan nuvttá guolleeriid ja lágain gáhttejuvvon mearrabivdovuoigatvuođaid Finnmárkku riddo- ja vuotnaguovlluid ássiide.

Pedersena mielas lávdegotti árvalus ja Bargiidbellodaga dahje nu gohčoduvvon Sosialademokráhtalaš jurddašanvuohki, lea dego ovtta muoras dahkkon.

- Ii leat buorre jus luottat báhcet háisut. Ja dan dáhká jus Bargiidbellodat ii dohkket Riddoguolástuslávdegotti árvalusa jođáneamos lági mielde, Pedersen oaivvilda.

Pedersena bellodatustit ja guolástusministtar, Lisbeth Berg-Hansen ii velge leat mearridan, áigugo doarjut Riddoguolástuslávdegotti árvalusa.

Arne Pedersen
Foto: Nils Henrik Måsø / NRK

Pedersen imaštalláge, gean guolástusministtar ovddasta dán oktavuođas, sosialademokráhtaid vai sin geat háliidit privatiseret guolásteami, ja geat oaivvildit ahte guolleearit galget leat gávppašangálvun.

Arne Pedersen lea maid Norgga Riddoguolástussearvvi nubbinjođiheaddji. Son rábmo sámediggepresideantta, Egil Olli, guhte čuollá Riddoguolástuslávdegotti árvalusa beale.

Guolástusministtar biehttala kommenteremis dán ášši nu guhká go ráđđádallamat Sámedikkiin leat jođus.