– Jus bagadalli galggašii diinegoahtit ruđa filmmain, de fertešii jođáneammos lági mielde beassat oanehisfilmmas guhkesfilbmii. Son ferte čájehit čehppodagas ja vuoitit bálkkašumiid festiválain. Danne fertešii leat juogalágán plána das mo sámi filmmaiguin beasašii daid deháleammos filbmafestiválaide, lohká Marja Bål Nango.
Filbmabagadalli Marja Bål Nango.
Foto: Tromsø Internasjonale Filmfestival / TIFFSon lea jo jurddašan guhká dán birra ja lohká del dehálaš oažžut ruhtadeami sámi filbmii vai livččii vejolaš ovdánit.
– Mii lea máŋga bagadalli dál geat háliidivččiimet ráhkadit filmmaid. Mii dárbbašat veahki vai čeahpimus filbmadahkkit beasašivčče viidáset, lohká Nango.
Sámediggeráđđelahttu Silje Karine Muotka mielas lea dát miellagiddevaš árvalus ja son lohká ieažas áigut bargat dáinna viidáset.
– Mun áiggun dán árvalusa ovddidit Sámediggeráđđái ja dalle de saddá dát oassin min plánain ovddosguvlui, lohká Muotka.
Dát movttidahttá filbmabagadalli.
– Diehttelasat lea buorre go olbmot váldet vuhtii mu árvalusaid. Dás berrejit bargat fárrolaga Sámi filbmainstituhtain, Sámi filbmabargiidservviin ja sámi bagadalliiguin, čilge Marja Bål Nango.
