– Gáibidan dásseárvvu

NBRa ovddeš nubbinjođiheaddji lea dolkamin riikasearvái go eai čuovu dásseárvulága.

Ellinor Guttorm Utsi
Foto: Eilif Aslaksen / NRK

– Dál lean gearggus dáhttut stáhtas veahkki jos fargga eai leat eambbo nissonolbmot NBRa stivrras. Nu lohká ovddeš nubbejođiheaddji Ellinor Guttorm Utsi.

Eanaš albmát

Norgga Boazosápmelaččaid Riikkasearvvi riikkačoahkkimis mannan váhku dieđihi Ellinor Guttorm Utsi ahte dál ferte leat doarvái.

Dál lea NBR stivrras ovcci láhttus guokte nissonolbmo, válgalávdegoddái okta nisu váljjejuvvon ja ii oktage dárkkistanlávdegoddái.

– Dát ii leat dohkálaš, diibmá lohppidi stivra bargagoahttit dáinna ja galge oččodit eambbo nissoniid ja nuoraid luohttámušdoaimmaide, mii lea dáhppáhuvvan, ii mihkiige, čilgesta Ellinor Guttorm Utsi ieš.

Váldit duođas

Ellinor Guttorm Utsi lohká dušše NBR nuoraidlávdegotti deavdit dásseárvogáibádusaid.

– Jos boahttejagi ii dáhppáhuva dás mihkiige, de gal fertejit eiseválddit čorgegoahttit dán dili, váruha Utsi.

NBR jođiheaddji Nils Henrik Sara oaidná dásseárvvu hástalusaid, muhto lohká váttis dan čoavdit.

– Ii leat dárbu stáhtas čorgegoahttit, hástalusa ferte NBR váldit, lohká Sara.