NRK Meny
Normal

– EM áigodat ii heive Sápmái

Áigodat go Conifa eurohpameašttirčiekčamat lágiduvvojit boahtte geasi, ii heive spábbačiekčanlihttui FA Sápmái.

Conifa sapmi
Foto: Sergey Gavrilov / NRK Sapmi

Sii leat cealkán ahte eai dáhto diekkár čiekčamiid go leat ráidočiekčamat, muhto dan eai oru čuovvolan, lohká FA Sámi hárjeheaddji, Isak Ole Hætta.

Landslagstrener Isak Ole Hætta

Isak Ole Hætta dadjá ahte ii leat riekta go buot joavkkut eai beasa váldit mielde daid buoremus čikčiid.

Foto: Kjell Are Guttorm / NRK

– Mii fertet boahtte áiggis oaččut vejolašvuođa dan ahte lágideamit eai leat dalle go buot joavkkut eai sáhte boahtit iežaset buoremus joavkkuin. Dat ii leat riekta go eai beasa boahtit buoremus joavkkuin, dadjá Hætta.

Dán gease čikče Conifa World Cupa, Staares Ruoŧas, dakkár áigodagas go sihke Suomas, Norggas ja Ruoŧas lei ráidočiekčan, nu ii fidnen spábbačiekčanlihttu buoremus čikčiid mielde. Boahtte gease lágida Isle Of Man Conifa EM čiekčamiid geassemánu álggus, áigodat mii ii soaitte dál ge heivet sápmái, buoremus čikčiid dáfus, vaikko dál besset buori áiggis oččodišgoahttit čikčiid mielde.

– Dat lea leamaš hui váttis Norgga spábbačiekčanlihtuin sirdit čiekčamiid 2. divišuvnnas bajás, muhto 3. divišuvnnas vulos gal lea leamaš álki, dadjá Hætta.

Turismaguovlu geasset

Isle of Man lea turismaguovlu geasset, nu leat buot orrunsajit diŋgojuvvon suoidnemánnui, danin ferte spábbačiekčanlihttu doppe sirdit čiekčamiid ja nu mannet mánu árat, lohká Conifa presideantta Per-Anders Blind.

– Suoidnemánus leat sajit hoteallas, ja de fertiimet sirdit čiekčamiid. Ja mu mielas lea dat hui suddu, dadjá Blind.

Blind lohká sohppon maŋŋá Staare čiekčaiid ahte fertejit suoidnemánus diekkár stuorra lágidemiid váldit, nu galggai boahttejagi maid, muhto heahtedilis fertejit sirdit čiekčamiid. Blind lohká maid FA Sámi, mii lea bovdejuvvon čiekčamiidda, árrat sáhttit čikčiid ja joavkkuid ektui bargagoahttit, go dihtet goas čiekčamat leat.

  • Guldal ášši:
    Ii heive FA Sápmái