NRK Meny
Normal

– Doaivu eanet bargosajiid

Poršáŋggu gieldda sátnejođiheaddji, Mona Skanke, doaivu oažžut dáhkádusaid das, ahte Suodjalus ásaha eambbo bargosajiid gildii.

Ordføreren i Porsanger Mona Skanke smiler.
Foto: Dan Robert Larsen / NRK

Poršáŋggu sátnejođiheaddji, Mona Skanke, lea duhtavaš dasa, go Norgga Suodjalusministtar lea lohpidan deaivvadit gieldda njunnožiiguin čakčat. Dát lea goitge dušše njálmmálaš lohpádus.

Skanke doaivu beassat čielggadit dan, makkár plánat Suodjalusas leat Poršáŋggu gielddas boahtte áiggis. Áigugo dat geahpedit doaimmaidis, nugo lea bargan maŋimuš logi jagi áigge, vai áigugo dat bisuhit ja lasihit doaimmaid.

GULDAL: Deaivvada Suodjalusministtariin

Sátnejođiheaddji lea dáhtton čoahkkinastit Suodjalusain dan maŋŋá, go Poršáŋggu Olgešbellodat čakčat dáhtui gieldda čájehit searaid Suodjalusa vuostá.

Olgešbellodat oaivvilda Suodjalusa leat váldán atnui Poršáŋggus menddo viiddis guovlluid seammás go geahpedit doaimmaideaset gielddas.

Olgešbellodat lea dolkan dása ja oaivvilda, ahte jus Suodjalus ii lasit doaimmaid, de gielda ferte geavahišgoahtit Suodjalusa areálaid eará doaimmaide, ovdamearkan astoáigge- ja mátkeealáhus doaimmaide.

Garnisonen i Porsanger
Foto: NRK

Poršáŋggu Garnisovnnas ledje logi jagi áigi sullii 1.300 olbmo. Dál doppe leat dušše 122 bargosaji. Seammás geavahit seamma viiddes guovlluid go ovdal, earret eará báhčin- ja bomben hárjehallamiidda.

Poršáŋggu Olgešbellodaga jođiheaddji ja sámediggeáirras, Knut Roger Hansena, mielas Bargiidbellodat ja sátnejođiheaddji Mona Skanke leat leamaš menddo geanoheamet dán áššis.