Silje Halonen, Kárášjoga Camping jođiheaddji, muitala ahte dássážii dán jagi leat leamaš ollu turisttat:
– Dat leat gal ollu turisttat jođus, muhto diimmá ektui eai leat nu olu. Mun jáhkan dat lea dálkki dihte. Diibmá lei nu fiinna geassi, ja dál lea leamaš nu galmmas.
Miehtá Eurohpá oidnet olbmot makkár dálki Davvi-Norggas lea. Halonen oaivvilda ahte galbma dálkkit eai geasut turisttaid, ja guhkkin eret norgalaččaid.
Eurohpás bohtet
Silje vásiha ahte leat eanaš hollándalaččat geat bohtet Kárášjohkii. Muhto son dadjá ahte tuiskkas maid bohtet olusat, ja maiddái eará báikkiin máilmmis nu go Japánas ja Kanadas.
Miehtá Davvi-Norgga leat dál turisttat jođus.
Foto: Eskil Soleng / NRKHalonen muitala ahte turisttat eai oru guhkká Kárášjogas, sii dábálaččat idjadit ovtta ija ovdal go mátkkoštit viidáset:
– Mannet viidásat Davvenjárgii, dahje fitnet jorgaleamen Davvenjárggas ja mannet fas máttás.
Báktegeahči lea mihttu
Beaivválaš jođiheaddji Visit Nordkapp:as, Åse Lill Barstad lea hui duhtavaš go dán geasi leat ná olu turisttat jo fitnan vaikko ain lea árrageassi.
Davvenjárgga báktegeahči lea dat báiki gosa eatnašat leat vuolgán ja leahkit buot davimusas máilmmis.
Barstad dadjá ahte Davvi-Norgga luondu maid geasuha olbmuid.
Čuvges boahtteáigi
Davvi Norgga mátkkit, beaivválaš jođiheaddji Álttá ossodagas, Hilde Bjørkli dadjá ahte Davvinjárga ja Lofoten leat turisttaid mihtut Davvi-Norggas.
Maŋimuš vihtta jagiid leat eanaš olbmot boahtán olgoriikkas, muhto dál leat norgalaččat čuovvulan:
– Orru leamen ahte eambbo norgalaččat háliidit Davvi-Norgii lupmui, dadjá Bjørkli.
Davvi-Norga lea duođaid geasuhišgoahtán turisttaid, ja Bjørkli jáhkká ahte Davvi-Norgga turistaealáhusain lea čuvges boahtteáigi.
