NRK Meny
Normal

– Dán sadjái berrejit eará čovdosat

Deanu várresátnejođiheaddji jáhkká Idjavuonduoddara boazoáiddi šaddat roassun. Su mielas lea buorre, go Luonddu hálddašandirektoráhta cakkada ceggemis dán áiddi.

Reingjerde på Ifjordfjellet
Foto: Hartvik Hansen

GULDAL: Hansen áiddi birra

Hartvik Hansen, varaordfører i Tana
Foto: Nils Henrik Måsø / NRK

Čorgaš- ja Lágesduoddara boazodoallit sohpe golbma jagi áigi cegget ovcci miilla guhkkosaš boazoáiddi Idjavuonduoddara badjel gáhttendihte dálveguohtumiid. Luonddu hálddašandirektoráhta goitge vuosttalda Deanu- ja Kárášjoga boazodoalliid áideplánaid. Direktoráhta celkkii gieskat, ahte boazoáidi vaháguhttášii ealliid ja heađuštivččii vánddardeaddjiid.

Deanu gieldda várresátnejođiheaddji, Hartvig Hansen, lea čađat cakkadan dán áiddi. Son árvala boazodoalliide dál eará čovdosiid guođohanváttisvuođaide.

– Ovdamearkan váddáseamos áiggiid sáhtášedje doalahit siiddaid sierra ja geavahit vaikko helikoptera dahje eará vugiiguin sirret ealuid.

Magne Ballovara
Foto: Nils Henrik Måsø / NRK

Suhttan

Deanu gielddastivrra eanetlohku lea dorjon áidehuksema. Čorgas orohaga jođiheaddji, Magne Ballovara, mielas dál lea menddo maŋŋit buktigoahtit eará árvalusaid.

– Dát lea leamaš almmolaš áššin juo badjel golbma jagi. Dat suhttada olbmo, go dál álget jietnadallat doppe, go dán áššis lea loahppa boahtimen.