NRK Meny
Normal

– Dálkedieđu lei illudahtti lohkat

Beanavuoddji Berit Astrid Utsi lea hárjehalladettiin garra dálkkis vásihan bártti. Dát ii baldán su otne vuosttas geardde čavgemes Finnmárkku beanavuodjingilvui.

Berit Astrid Utsi.

Berit Astrid Utsi ja badjelaš 40 eará beanavuoddji leat vuosttaš geardde dál gilvaleamen Finnmárkku beanavuodjimis, mii álggi odne Álttás.

Foto: Kolbjørn Norvang / NRK

– Lean dálkedieđuid gullan ja lean maid gulaskuddan makkár siivu lea, ja orru goit vuos ahte beassat buori dálkkis gilvalit, lohká Berit Astrid Utsi.

NRK Sápmi hálešti suinna nuppelogi tiimmu ovdal dán jagáš Finnmárkku beanavuodjingilvvu, mas otne ovdalgaskabeaivve lei vuolgga Álttás.

Son lea okta dain guhte vuosttaš háve dál lea gilvaleamen 500 kilomehter beanavuodjimis Finnmárkkus.

Dán jagi lea Finnmárkku beanavuodjingilvu maid máilmmimeašttirgilvu, ja oktiibuot badjelaš 110 beanavuoddji gilvalit juogo 500 kilomehter dahje 1000 kilomehter guhkkosaš beanavuodjimis.

Gopmánii oktan reagain

Diibmá lei oalle garra dálki Finnmárkku beanavuodjingilvvuid áigge.

Vaikko Utsi ii lean mielde dien gilvvus, de diehtá son movt sáhttá geavvat jos garra dálkái fáhtehallo beanavuodjimis.

– Oktii go ledjen vuodjimen Hálkavári lahka Porsáŋggus, vásihin nu garra biekka ahte dat gomihii mu oktan dainna reagain, muhto beatnagat leat hárjánan vaikko makkár biekkas ruohttat, de dán gilvvus galggašii mannat bures, lohká Utsi.

Sávvá leat 20 buoremusaid searvvis

Utsi sávvá ahte vuodjenláhtut leat buori ja ahte ii dárbbaš váivašuvvat menddo dipma siivvuin.

Vaikko vel lea ge vuosttaš geardde mielde Finnmárkku beanavuodjingilvvus, de ii bala bidjamis čielga mihttomeari dasa movt gilvvus birge.

– Mon áiggošin gal vuossárgga veaigin fas ollet Áltái ja sávan ahte in šatta fuonit go guoktelogádin gilvvus, lohká Utsi ja mojohallá.

Finnmarksløpet

Guhkimus láhttu Finnmarksløpet-gilvvus manná Álttás gitta Girkonjárgii, ja lea 1000km guhku.

Foto: Finnmarksløpet