NRK Meny
Normal

– Dál livččii áigi hukset geainnu Guovdageainnus Ráisii dahje Gáivutnii

Guovdageainnu politihkkárat oaivvildit, ahte giddejuvvon geaidnu Reaššegeažis rihtu geažil čielgasit čájeha dárbbu hukset ođđa geainnu.

Sátnejođiheaddji Klemet Erland Hætta ja gielddapolitihkkár Klemet Klemetsen.

– Dál livččii áigi ahte Guovdageainnus hukset geainnu duoddara badjel Romssa beallái, oaivvildeaba gielddapolitihkkárguovttos Klemet Erland Hætta ja Klemet Klemetsen.

Soai leaba jo jurddašan gokko ođđa geaidnu galggašii mannat. Sátnejođiheaddji Klemetsen Erland Hætta čujuha ja čilge.

– Geaidnu joatkkášii dás, gosa jo manná, Biedjovákkis ja manná Gáivutnii. Diet geaidnobihttá livččii sávaldat. Ii livčče earágo 80 kilomehtera guhkki. De livččii oalle álki Guovdageainnus Romsii vuojestit golmma diimmus, ákkastallá Hætta.

Ráisii livččii ges 40 kilomehtara geaidnobihttá mii váillušii, Biedjovákkis Ráissaávžái

Rihtu giddii oktavuođa máttás

Ikte šadde biilavuoddjit vuodjit gitta 700 kilomehtara mohki Suoma ja Sis-Finnmárkku bokte go E6 geaidnu lei gitta Reaššegeažis Romssas.

Dát lea fas cahkkehan ságastallama das, ahte geaidnu galggašii huksejuvvot Guovdageainnus njuolgga Romssa beallái Ráisii dahje Gáivutnii.

– Jus geahččá dorvvolašvuođa ja buohcciviesu ektui, de šattašii lagat Tromssa buohccivissui go Hámmerfeastta buohccivissui ja maiddái eanet dorvvoleabbo beassat dohko ja mii diehtit ahte dat buvttášii olu ávkki min álbmogii, oaivvilda Hætta.

Ná lei beaivet otne rihtubáikkis Reaššegeažis. Govven: Klemet Anders Sara, NRK

Ragnar Olsvik ja su guoibmi finaiga mannan vahkkoloahpa geasseviesus Sáttomohkis (Oksfjordhamn), mii lea dušše guokte miilla eret Reaššegeažis. Sutno mátki guhkui 43 miillain go šattaiga Suoma bokte vuodjit ruoktot Romssa gávpogii.

– Ii galggašii leat nu, ahte Norga juhkkojuvvo guovtti oassái go lea rihtu. Fáhkka fertet vuodjit Suoma bokte ja lihkus lei rabas Suoma bealde, šuohkiha Olsvik.

Geaidnu Guovdageainnus Romssa beallái Ráisii lea ovdal máŋgii guorahallojuvvon, muhto juohke háve lea ášši bisánan luonddugáhttema geažil.

Guovdageainnu politihkkárguovttos goit eaba áiggo dan dihtii vuollánit.

– Dát šaddá goit mu bealis hui guovddáš ášši maid mun goit áiggon čuovvolit ja álggahit ságastallama ja oažžut dán johtui, lohká Klemetsen.

– Mun sávan ahte dálá ráđđehus, mii lea lohkan ahte sii áiggošivčče vuoruhit johtolaga ja erenoamážit geaidnohuksema, liikošii dása, sávvá Hætta.