Norga geigii Dalai Lama 1989:s Nobelráfi bálkkašumi ráfáláš rahčamušaid geažil ja lea gutnálaččat dan rájes váldon vuostá, maiddái eiseválddiid bealis. Muhto dál orrot áigumin norgga njunuš eiseválddit, Kiinná oktavuođa geažil, eará
láhkai fertet meannudit Dalai Lama galledemiin, ja eaige searvat suinna deaivvadit.
Norgga olgoriikkaministtar, Børge Brende, logai ievttá Stuorradigge gažadanbottus:
– Mii fertet diehtit ahte jus fal norgga eiseválddit deaivvadežžet Dalai Lamain, de dagaha dat váddásabbon normaliserehit oktavuođa Kiinnáin. Dan mii fertet rahpasit ja vuoiggalaččat dovddastit.
Unohis dovdu
– Mun gal anán hui árvvus dan go Norga lea ožžon dan gudni ahte juohkit Nobelráfi bálkkašumi, ja dat lea dieđusge dan dihtii go Norga lea alo deattuhan olmmošvuoigatvuođaid dehálašvuođa ja dan dihte mun dovddan stuorra unohisvuođa go orru dainna lágiin ahte Dalai Lama ii leat bures boahtin deike min servvodahkii, dadjá Keskitalo.
Ekonomiija dehálat
Dat ii berrešii lea nu, ja mu mielas leat dat árvvut, nugo olmmošvuoigatvuođat, dat berrešedje leat dehálabbot midjiide go ekonomalaš ovdáneapmi.
Manne bat don dan logat?
Mun dan dajan dan dihte go olmmošvuoigatvuođat ja friddjavuohta ja demokratiija, dat eai boađe nuvttá.
Dain lea maid muhtunlágan haddi ja dat lea haddi maid mii leat máksán min servvodagas ja maid mii áinnas berrešeimmet oktii vel máksit go dat leat dan mađe dehálaččat ja divrasat midjiide.
Eai leat mearridan
– Presideanta, mun lean vuosttasin dovddastit ahte dán váttis áššin mas leat vuosteákkat ja daid mii fertet maid váldit vuhtii.
Mihttun galggašii leat ahte mii Norggas nagodivččiimet normaliseret oktavuođa Kiinnáin. Dál lea heittot oktavuohta, dadjat jo áibbas oktavuođa haga. Politihkalaš oktavuohta Norgga ja Kiinná gaskka ii leamaš 2010 rájes.
Mii eat leat vel mearridan galget go norgga eiseválddiid áirasat deaivvadit Dalai Lamain,
Min áigumuš lea dál buoridit Kiinná oktavuođa ja stuorradiggeáirras galggašii leat vávján ahte in leat oppanassiige vuos namahan daid ekonomalaš beroštumiid, muhto in čiegat ahte gávpešiehtadusas, friddjagávpešiehtadusas, mainna ovddit Ráđđehus lei bargagoahtán, ii boahtán mihkkege maŋŋá 2010 dáhpáhusa, logai Børge Brende.
.
Alo bures boahtin
– Dalai Lamai lei hui váimmolaš bures boahtin Sápmái dalle go vuosttas gearddi finai Sámedikkis, ja mii gal su olles váimmuin válddášeimmet vuostá Sámediggái fas, deattuha Keskitalo.