Buorre go lágidit juoigangilvvuid

– Nu movt mun lean ádden dán jurdaga, de lea dat ahte movttiidahttet eambbosiid searvat SGP juoigangilvvuide, ja mu mielas lea dá hui buorre jurdda. Dát lokte dan luođi eará dássái ja das šaddá viidodat, dadjá Sara.
Sámi musihkkafestivála lágida beassášlávvordaga juohke jagi SGP lávlun ja juoigangilvvu, ja sii háliidivččii dál ahte juigiin galgá leat vejolašvuohta vuoitit saji Sámi Grand Prixii juo ovdalgihtii skábmadoaluin, juoigankonsearttas, Guovdageainnus.

Gávdnat lágideddjiid eará guovlluin

Sámi musihkkafeastivála lágida juoigankonseartta skábmadoaluin Guovdageainnus, ja dan oktavuođas lea juigiin vejolašvuohta searvat gilvui mas vuoiti oažžu fálaldaga searvat boahtte jagi SGP juoigangilvui. Dál leatge bargamin dainna ahte gávdnat lágideddjiid ja oažžut sullasaš gilvvuid maiddái eará guovlluide, muitala Sámi Musihkkafestivála buvttadeaddji Klemet Anders Buljo.
– Mii leat bargame garrasit oažžut eará sámi guovlluide nu go Ruŧŧii, Supmii ja maid Ruššii dákkár juoigangilvvuid, lohka Buljo.

Galggaše oassegilvvut

Biret Ristin Sara ii loga iežas dovdat ášši, ja mo Sámi musihkkafeastivála lea jurddašan čađahit gilvvuid nu bures, muhto lohka sin searvvi ovdal árvalan dakkár gilvvuid lágidit. – Dat galggašedje dakkár oassegilvvut máŋgga báikkis, ja dat luođit galggašedje gullon ovdal nie movt dáža Grand Prixas, lohka Biret Ristin Sara.

SGP juoigangilvvuin leat juohke jagi logi juoigi mielde. Jus dál šaddá nu mo lágideaddjit sávvet, de lágiduvvojit njeallje oassegilvvu ovdalgihtii, ja njeallje juoigi leat de gergos boahtte jagi SGP gilvvuide.

Ođđa luohti

Loahpas dadjá Buljo vel ahte dat njeallje juoigi geat besset viidáset juoigangilvvus, fertejit beassášlávvordaga oasálastit finálas ođđa luđiin, danne go luođit eai galgga leat almmuhuvvon ovdal lávddi alde, beassášlávvordaga.