Dán dadjá Guovdageainnu Johttisápmelaččaid searvvi jođiheaddji Nils Mathis Sara, iige loga riektan ahte ovttaskas boazoeaiggát akto galgá bargat áššiin.
Báhčinmearkkas duolljis gokko bahádahkkit leat jámas báhčán Ivgoláhku bohccuid luoddagurrii. Boazosápmelaččat fálles 30-dufát ruvnno dasa geas leat eanet dieđut dáhpáhusas.
Foto: Isak Thomas GaupSon dadjá bures ipmirdit ahte boazoeaiggádat ruhtavehkiin geahččalit suodjalit iežaset bohccuid ja eallinláibbi, ja geahččalit oččodit veahki eará olbmuin geat dáidet diehtit dáhpáhusaid birra.
Lei mannan vahkoloahpa go beakkehii ahte Ivgoláhku boazoeaiggádat fállet 30.000 ruvnno dieđuid ovddas geat sin bohccuid leat báhčalan.
Báhččojit luoddagurrii
Sara dadjá ahte ealáhusorganisašuvnna bealis fertejit olbmuide čilget boazoealáhusa ja doaimma birra, ja maiddái čilget báikki olbmuide manin bohccot leat dan guovllus gos leat.
Sara ii sáhte dadjat man stuorra váttisvuohta dát lea, muhto lohká gal dáhpáhuvvat ahte bohccot báhččojit lahka luottaid.
Beallejámas báhččon
Ivgoláhku boazoeaiggát Henrik Gaup muitalii NRK Sápmái ahte bohccot leat báhččon jámas luoddagurrii, ja ahte bahádahkkit leat biillain láseráigge báhčán bohccuid.
Son muitalii ahte sii leat gávdnan beallejáms báhččon bohccuid maiddái.
Eastadanbarggu álggahit
Nils Mathis Sara dadjá dárbbu mátkáibidjat eastadanbargguid, danin go boazu han lea boazoeaiggáda opmodat ja birgejupmi, ja dagaha stuorra vahága boazoeaiggádiidda geat giksašuvvet go bohccot báhččojuvvojit.
Son dadjá dán leat nu stuora áššin ahte dan ferte loktet digaštallamii organisašuvnna siskkobealde. Sara lohká maiddái vuordit ahte Johttisápmelaččaid searvái dát ášši dál álggos loktejuvvo.
